تێشتا ژ دەرڤە
دلۆڤان ئاكرەیی
ل گەل بۆرینا دەمی كارتێكرن ب سەر تیتالێن جڤاكان دا دهێن و د سالێن دووماهیێ دا، دیاردا خوارنا تێشتێ ل دەرڤەی دیۆارێن مالێ ب تنێ وەك گوهۆرینەكا رۆتینی نەمایە دناڤ جڤاكێ مە، بەلكو خۆ وەك پشكەك ژ شێوازێ ژیانێ و كلتۆرێ جڤاكی یێ نوو فەرز كریە، ئەڤ رەفتارا رۆژانە، هەرچەندە د ناخێ خۆ دا كۆمەكا رەهەندێن دەروونی و جڤاكی یێن ئەرێنی هەلدگریت، لێ د هەمان دەم دا زەنگەكا هشیاریێ یە ل بەرامبەر هندەك ئاستەنگێن جەستەیی و ئابووری كو پێدڤی ب هەلسەنگاندنەكا هوور هەیە و ژلایێ دەروونی ڤە، تێشت ل دەرڤە وەك دەرفەتەكا زێرین دهێتە هژمارتن بۆ نووژەنكرنا وزەیا مرۆڤی و بهێزكرنا تێكەلیێن خێزانی و هەڤالینیێ و دەركەفتن بۆ ناڤ ناڤەندێن گشتی یان ژینگەهێن سروشتی، مرۆڤی ژ فشارێن كارێ گران و ماندیبوونا رۆژانە دوور دكەت، كو ئەڤە ژی دبیتە ئەگەرێ بلندبوونا مۆرالێ مرۆڤی دا كو ب چالاكیەكا پتر دەست ب رۆژا خۆ بكەت و ئەگەر ئەم لاپەرێ دی یێ ڤێ دیاردەیێ هەلدەین، دێ بینین لایەنێ ساخلەمیێ دكەڤیتە بن گەفان و پرانیا خوارنگەهان، بۆ هندێ تامەكا سەرنجراكێش پێشكێشی بكڕێن خۆ بكەن، پەنایێ دبەنە بەر بكارئینانا رێژەیەكا زێدە ژ خوێ، شەكر و رۆنێن نێچیر و ئەڤ پێكهاتە مەترسیێن راستەوخۆ ل سەر سیستەمێ دل و دەماران دروست دكەن و دببنە ئەگەرێ زێدەبوونا كێشەیا لەشی ب شێوەیەكێ نەساخلەم،
ژ لایێ ئابووری ڤە ژی، تێچوویەكا بلند ل سەر بودجەیا هەیڤانە دروست دكەت، لەوما بۆ پاراستنا هەردوو لایەنان، یا فەرە مرۆڤ بنەمایێ هەڤسەنگیێ پەیڕەو بكەت و نەمەرجە مرۆڤ ب ئێكجاری خۆ ژ ڤێ چێژا جڤاكی بێ بەهر بكەت، لێ یا باش ئەوە ئەڤ دیاردە ببیتە رێورەسمەكێ وەرزی یان هەفتانە (بۆ نموونە بتنێ رۆژێن ئەینیێ) هەروەسا، پێدڤی یە د ناڤ خوارنگەهان دا ژی هەول بهێتە دان بژاردەیێن ساخلەمتر وەك پرۆتینێن كەلاندی و زەرزەواتێن فرێش بهێنە هەلبژارتن، دا كو مرۆڤ هەم چێژا جڤاكی وەربگریت و هەم ژی سەرمایەیا خۆ یا ساخلەمیێ بپارێزیت.
