تێشت
حكیم عبدالله
ب كۆتەك شیا خۆ ژبن دیوار و بانێ خانیێ هەڕفتی بینیتە دەر و ب غار قەستا مال بكەت. تۆز و دوومانە و عەورەكێ رەش وشین ژ گۆرمێنا بەری چەندەكێ رویدای ل هنداڤ تاخێ وان پەیدا بوو. سەر و چاڤێن خوین و پرچا قژاڤژ و كراسێ هنج هنج. دو پرتێن نانی كربوونە د ناڤ لفكا كراسێ خۆ دا و ب هەر دو دەستان یا ب سینگێ خۆ دا ددەت و پرچا خۆ ڤەدچڕیت.
– دادێ ما چ نینە بخۆین ئەم دبرسینە…؟
– بلا هەی ئەز قوربان… دێ نوكە چم سەحكەمە ڤارا و مالێن جیرانا بەلكی تشتەكی پەیدا كەم.
– دێ بلا دادێ… بەس زوی وەرە دێ ل هیڤیا تە بین.
– بلا هەی حەیرانا بەر دلێ دایێ… هەتا ئەز دهێم هوین خۆ مژویل كەن و پیچەكا یاریا بو خۆ بكەن، بەس ژ مال نە دەركەڤن.
– بلا دادێ.
قێڕی و هەوارێن وێ یێن دچنە بەر ئەسمانا. خوین و تۆز و ئاخ یێن تێكەل بووین ب سەر چاڤێن وێ دا هاتین و هەر ژ ڤێرێ و وێراهە یا د هلنگڤیت و دكەڤیت و جارەكا دی رادبیتە ڤە و بەرێ وێ ڕك یێ ل مالا وێ. هێژ نەگەهشتیە مال، هندەك گەنجان پرتێن لەشێن هەر دو زاڕۆكێن وێ ژ بن كاڤلێ خانی ئینابوونە دەرێ وبەرەڤ وێ مەیدانكا ژ وان وێڤەتر دبرن.
– ئەڤە هوین دێ زاڕۆكێن من یێن خۆشتڤی كیڤە بەن ؟
گەنجەكی ب دلەكێ كوزری بەرسڤا وێ دا:
– دێ بەین دانینە دگەل خەلكێ دی یێ تاخی دا هەمیا پێكڤە ڤەشێرین…!
– بۆ خاترا خودێ راوەستن دا تشتەكی بدەمێ چونكی هێژ تێشت نەخوارینە و پاشی ببەن…!
