تێکـدانا ئاشتییا جڤاکـی هێلا سـۆرە
هه‌ولێر، قائید میرۆ:
سكرتێرێ سه‌ندیكا رۆژنامه‌ڤانێن كوردستانێ د دیدارەکێ دا بۆ ڕۆژناما ئەڤرۆ دیار کر کو نها ئه‌و میدیایا ل خه‌تێ نیشتیمانی و ئه‌وا كار بۆ تێكدانا ئاشتیا جڤاكی دكه‌ت ناهێنه جوداكرن و گۆت؛ ئه‌م دگه‌ل ئازادیا میدیایێ نه، به‌لێ پێدڤیه بهێته رێكخستن.
هندرێن ئه‌حمه‌د، سكرتێرێ سه‌ندیكا رۆژنامه‌ڤانێن كوردستانێ دیار كر، ژ ئه‌گه‌رێ پێشكه‌فتنا ته‌كنه‌لۆژیا په‌یوه‌ندیان و په‌یدابوونا دیجیتال میدیا و سۆشیال میدیایێ و نه‌بوونا قانوونه‌كا تایبه‌ت ب ئه‌ڤی بیاڤی، سوشیال میدیا بوویه ئه‌گه‌رێ په‌یدابوونا فه‌وزایێ.
سكرتێرێ سه‌ندیكا رۆژنامه‌ڤانان، دیار کر کو ژبه‌ر هه‌ڤڕكیا سیاسی ل نافخۆ، هه‌روه‌سا ژ ئه‌گه‌رێ هه‌ڤڕكیا سیاسیا دناڤبه‌را نه‌یارێن هه‌رێما كوردستانێ ل ده‌رڤه‌ی كوردستانێ، هژماره‌كا ده‌زگه‌هێن راگه‌هاندنێ هاتینه دامه‌زراندن و نوكه یێ كار دكه‌ن و گۆت؛ به‌لێ كه‌س نزانیت كیژ ژ وان ده‌زگه‌هان ل خه‌تێ نیشتیمانیە و كیژ بۆ تێكدانا ئاشتیا جڤاكیە یان کیژ بۆ كارێ رۆژنامه‌ڤانیێ كار دكه‌ت، له‌وڕا ئه‌ڤی بابه‌تی پێدڤی ب رێكخستنێ هه‌یه.
هندرێن دیار کر ژی، پێدڤیه ئه‌و ده‌زگه‌هێن دیجیتال میدیا خۆ تۆمار بكه‌ن، ژلایه‌كێ دیڤه ئەو رۆژنامه‌ڤانێن ل ئه‌ڤان ده‌زگه‌هان كار دكه‌ن ئەتەکێتێن شه‌ره‌فا رۆژنامه‌ڤانیێ په‌یره‌و بكه‌ن و گۆت؛ ئه‌ڤه‌ژی بۆ ڤێ مه‌ره‌مێ یه ره‌ش و سپی پێكڤه نه‌هێنه سۆتن و باش و خراب بهێنه جوداكرن و كه‌س ب ئاگرێ كه‌سێ نه‌سۆزیت و داب و نه‌ریتێن جڤاكی و ئاشتیا جڤاكی به‌رچاڤ بهێته وه‌رگرتن.
سكرتێرێ سه‌ندیكا رۆژنامه‌ڤانان د بەردەوامیا ئاخفتنێن خۆدا دیار کر، هه‌رێما كوردستانێ پێدڤی ب دامه‌زراندنا ده‌زگه‌هێ په‌یوه‌ندی و میدیایێ هه‌یه مینا ده‌سته‌یا په‌یوه‌ندیان ل عێراقێ، هه‌تا ل گوره‌ی قانوون و رێنمایان سه‌ره‌ده‌ریێ بکەن دگه‌ل ئه‌ڤێ هژمارا زۆر یا وێب و تیڤی و ده‌زگه‌هێن كار دكه‌ن و گۆت؛ بدیتنامن دڤێت سه‌ندیكا رۆژنامه‌ڤانان ده‌ستهه‌لات هه‌بیت بۆ رێكخستنا هه‌موو وان ده‌زگه‌هێن كارێ میدیایی دكه‌ن.
