تێکچوونا دەروونى تۆڕەبوونێ ل دەف مرۆڤى پەیدا دکەت
دلوڤان هاڵو:
چارەسەرکارەکێ دەروونی بۆ ڕۆژنامەیا ئەڤرۆ دیار کر کو هەردەمێ توڕەبۆنا مروڤی ژ ڕاددێ سروشتی دەرکەفت و یا بەردەوام بو، پێدڤییە سەرەدانا نۆشدارەکێ دەروونی بکەت داکو ب زویترین دەم چارەسەرییا وی بهێتە کرن.
بەهدین کنجی ئامێدی، چارەسەرکارێ دەروونی دیار کر کو تۆڕەبوونا بەردەوام کارتێکرنەکا مەزن ل سەر دەروون و لەشێ مرۆڤی هەیە، ئەڤجا ئەڤ تۆڕەبوونە چ ژ ئەگەرێ ژ دەستدا کەسەکێ یان تشتەکێ بیت،
وەکو مرنا کەسەکێ نێزیك یان ژێکڤەبوون و دوورکەفتنا کەسەکێ یان ژی گڤاشتنێن جڤاکی و ئابووری.
چارەسەرکارێ دەروونی دیار کر ژی، سەرەدەریا مرۆڤی ل گەل ڤان پێشهاتان دبیتە ئەگەرێ تۆڕەبوونەکا بەردەوام و دبیتە سیستەمەکێ جێگیر و گۆهۆڕینێن ڕیشەیی د دەروون و لەشێ مرۆڤی دا دروست دکەت ب تایبەت ئەو گۆهۆڕینا د مەژیێ مرۆڤی دا دروست دبیت کو ئەو ژی هۆرمونێ کورتیزۆلە کو یێ دودلیێ یە.
بەهدین گۆتژی: تۆڕەبوونا بەردەوام ڕێژا ڤی هۆرموونی زێدە دکەت، بڤێ چەندێ مێشك نەشێت سەرەدەرییەکا درست لگەل زێدەبوونا ڤێ هۆرمونێ بکەت و وێ تۆڕەبوونێ ڕاوستینیت و هەست و سۆزێن مرۆڤی کۆنترۆل دکەت و ناهێلیت ژبلی تۆڕەبوونێ ئارامی ل دەف مرۆڤی پەیدا ببیت.
ئامێدی د بەردەوامیا ئاخفتنێن خۆدا دیار کر کو ژبەرهندێ ب شێوەیەکێ ئۆتوماتیکی دێ سرۆشتێ وی کەسی هێتە گۆهۆڕین بێی کو ئەو بخۆ هەست پێ بکەت و گۆت: ئەڤ نیشانە ل دەف وی کەسی پەیدا دبن کو هەردەم یێ بێ گێولە و دترسیت و نە یێ ئارامە و نەمایە ئەو کەسێ جاران و یێ بێ تەحەملە و تۆڕە دبیت و دگریت و گێولێ چوونا ژ دەرڤە نینە، گەلەك هزرێن نەرێنی دکەت، تشتان زوی ژبیر دکەت.
بەهدین ئامێدی ئاماژە ڤێ چەندێ ژی کر کو تورەبۆنێ چەندین کارتێکرنێن خراب لسەر لەشێ مرۆڤی هەنە وەکو دلی و گولچیسکان و قۆلۆنێ و پەنکریاسێ و سیستەمێ ڤان ئەندامێن لەشی تێکددەت لگەل هندێ بێهنتەنگی و ئاریشەیێن غوددێ و بەرگریا لەشێ مرۆڤی لاواز دکەت و گۆت: لەوڕا هەکە تۆڕەبوونا مرۆڤی یا بەردەوام بوو پێدڤییە سەرەدانا نۆشدارەکێ دەروونی بکەت دا کو ب زووترین دەم چارەسەرییا وی بهێتە کرن و بزڤڕیتە سەر سرۆشتێ خۆ یێ جاران و ژیانا خۆ ب شێوەیەکێ ئاسایی و ساخلەم دەرباز بکەت.
