تەناهی دەربازبوو و شێلادز ئێكلا نەبوویە
قەیس وەیس:
تیما یانەیا تەناهی دەربازبوو قۆناغا دویێ ژ خولا پلا دو یا كوردستانێ و چارەنڤیسێ یانەیا شێلادزێ مایە هەلاویستی د چارچووڤەیێ كۆما پارێزگەها دهۆكێ ئەوا شەش یانەیان پشكداری كرین.
ب دووماهی هاتنا یاریێن گەڕا چارێ ژ كۆما پارێزگەها دهۆكێ رێزبەندیا خولێ بڤی شێوەیە، هەردو یانەیێن شێلادزێ و تەناهی ل رێزێن ئێكێ و دویێ دهێن ب شەش خالان، باتیفا ب پێنچ خالان رێزا سێیێ دهێت، شێخان چار خالان و بەردەرەش ب سێ خالان رێزێن چارێ و پێنجێ دهێن، یانەیا دینارتە رێزا شەشێ بێ خالە پشتی بڕیارا ئێكەتیا تەپا پێی ب لادانا هەمی ئەنجامێن وێ و سزادانا چەند یاریزان و دو ئەندامێن كارگێرێ دەرئەنجامێ توندوتیژی بەری چەند حەفتیان دژی دادڤانێن یاریێ كری.
دبیت باتیڤا ل جهێ شێلادزێ دەربازبیتە قۆناغا دویێ
هەرچەندە تیما یانەیا شێلادزێ شەش خال كۆمكرینە و سەرێ لیستێ دهێت لێ دێ چاڤەڕێ ئەنجامێ دووڤچوونا لژنەیا تایبەت یا ئێكەتیا تەپا پێی ل سەر سكالایا یانەیا بەردەرەش بیت ئەوا دیار كری یانەیا شێلادزێ سەرپێچییا یاسایێ كریە ب پشكداریكرنا چار یاریزانێن پیشەكار رەكەز عەرەب ل جهێ سێ یاریزان، ل دووڤ رێنمایان نابیت یانە زێدەتری سێ یاریزانێن پیشەكار دناڤ تیما خوە دا زێدەكەت و هەكە سەرپێچی كر دێ هێتە سزادانا ب خوسارەتی 3-0 ، لەوما هەكە بڕیارا سزادانا تیما شێلادزێ هاتە دان دبیت یانەیا باتیفا ل جهێ شێلادزێ دەربازبیت، چنكو باتیفا خودانا پێنچ خالانە رێزا سێیێ، شێلادز د یاریا دگەل بەردەرەش ب گۆلەكێ وەكهەڤبوو و ئەو خال ژی دێ هێتە بڕین ب پێنچ خالان وەكو ئێكبن لێ ب گۆلان باتیفا سێ گۆل زێدەتر هەنە.
