تەنا گەنمی ب 850 هزار دیناران ژ جۆتیاران دێ هێتە كڕین
هەولێر، قائید میرۆ:
رێڤەبەرێ گشتیێ بازرگانی ل هەرێما كوردستانێ ئاشكرا كر، پێشبینی دهێتە كرن هەیڤا داهاتی پرۆسا وەرگرتنا گەنمێ جۆتیاران بهێتە دەستپێكرن و دبێژیت: ئەڤ سالە ژی هەر تەنەكا گەنمی ب 850 هزار دیناران ژ جۆتیاران دێ هێتە وەرگرتن.
نەوزاد كامل، رێڤەبەرێ گشتیێ بازرگانی بۆ رۆژناما ئەڤرۆ دیار كر، دوهی ل پارێزگەهێن باشوورێ ئیراقێ پرۆسا وەرگرتنا گەنمێ جۆتیاران هاتیە دەستپێكرن، ژ بەركو بەرهەمێ گەنمێ وان زووتر دگەهیت و گۆت: «ئەم پێشبینی دكەین هەیڤا داهاتی ل هەرێما كوردستانێ ژی پرۆسا وەرگرتنا گەنمێ جۆتیاران بهێتە دەستپێكرن، سیستەمێ وەرگرتنا گەنمی دێ هەمان سیستەمێ سالا بۆری بیت بۆ هەر تەنەكا گەنمی 850 هزار دینار هاتینە دیاركرن».
نەوزاد كامل گۆتژی: «پێشبینی دهێتە كرن ئەڤ سالە رێژا بەرهەمێ گەنمی ژ پار زێدەتربیت، چونكی جۆتیارێن مە زێدەتر بەرهەمێ گەنمی چاندیە و هاتنا بارانێ ژی زێدەتر بوویە، ئەڤێ چەندێ دێ كاریگەری ل سەر زێدەبوونا بەرهەمی هەبیت، هەر جۆتیارەكێ بەرهەمێ خوە رادەستی سایلۆیێ بكەت دێ پارێ گەنمی وەرگریت، ئەو گیرۆبوونا بەرێ نەمایە یا پارێ جۆتیاران و نوكە ئێكسەر پارە بۆ دهێتە مەزاختن».
