تە دڤێت..
ئیحسان سەردار
تە دڤێت هندەك تشتا بزانی؟
تە دڤێت ڕەوشا
نە ئارامییا من بزانی؟
پرسیارا عەورێن ڕەش بكە
كا چەند ب سەر من دا
دلۆپ ڕژتینە
تە دڤێت ڕەوشا
خەوكا من بزانی؟
پرسیارا شەڤێن درێژێن
زڤستانەكا پڕی سەقەم بكە
كا چەند شەڤا د قولاچەكا
تاڕی و ساردا د بێرییا تەدا پەلكێ
قەلوینا من ل بەر وێنەیێ تە بریسقییە
تە دڤێت ڕەوشا
هزرێن من بزانی؟
پرسیارا ئەسمانەكێ ساهی بكە
كا چەند شەڤان ل سەر
لاپەڕێ ئەسمانی بوویمە
لیۆناردۆداڤنشی و
كەڤالێ تەیێ وەك مۆنالیزایێ
دناڤا ستێر و عەوران دا
نیگار كرییە
تە دڤێت ڕەوشا لێگەریانێن من بزانی؟
پرسیارا دەریا و ڕویبار و نزاران بكە
كا چەند رۆژا بوویمە گلگامێش
و ل دەرمانێ نەهێلانا
خەمێن غەریبیا تە گەڕیایمە!
تە دڤێت دەربارەی
داخوازیێن من بزانی؟
پرسیارا دلێ من بكە دێ چەوا
زمان دگەل پەیڤا كەتە شەڕ
ب تنێ دێ تە داخوازكەت
ب تنێ دێ تە داخوازكەت.
