تە چ دڤێت وە بکە
فەهیما ئیبراهیم
رمشاید – ئەلمانیا
تە چ دڤێت وەبکە، ئەز هەموو نیازێن تە دزانم، بریار یا ددەستێ تە دا. بمینی.. بچی… تو خودانێ بریارێی. ئێدی من چ نەڤێت. یا گەهشتیمە رادەیا هشکبوونێ. هەستێن من یێن ژ هەر تشتەکی ڤالابووین. پرتێن من یێن ل هەر جهەکی بەلاڤ بووین. من شیان نینن كۆمڤەکم. مینا بەرەکی رەق وهشك وبێدەنگ، چ تشت کارتێکرنێ ل من ناکەت، نە چ هیڤی ماینە و نە ئۆمێدەک بۆ مانێ.
بتنێ ئێک پێنگاڤ بەرەڤ وی ڤە چوو، دەستێن خوە بلندی ئەسمانی کرن و مینا هەر ڕۆژ لاڤ ژ خودێ دکرن چارەیەکێ بۆ دەردێ وێ یێ گران ببینت. دوبارە ل وی زڤڕی و گۆت: تە چ دڤێت وە بکە، من هەموو هەست یێن ژ دەستداین، ئێدی من چ تشت نەماینە. ئاگری بەردە ژیانێ، من چ لێ نەمایە ژ بلی خەما، بلا ئەو ژی بسوژن. ب دوماهیک هات، قەدەرا مە بوو داوی دیتن ئەڤ شەڤە بت، شەڤەکا بێ ستێر و هەیڤ بوو. ب تنێ تارییێ شاپەڕێن خوە بەردابوون سەر، پشتی ڤی ئاگری سەرمایەک بەرببوو ناخێ من، ژ نیشکەکێڤە تشتێ مایێ ژی مر.
بێدەنگییەکا کوژەکە، نە دەنگ و دۆرک ژێ دهێتە بیهستن، نە چ پێژن دکەڤنە بەرگوها، من خوە ل هیڤییا وەرزێ بارینا هیڤییا گرت، لێ هشکەسالیێ نەهێلا چ بەرهەم بدەت.
ئەڤ دەمە هەموو من دگەل تە بۆراند، ب ڤان هەستێن سار تە سەرەدەری دگەل من کر، ل داوییێ ژی دبێژی هەر ژ دەستپێکێ ژ نەچاری دگەل تە بووم. تو باش دزانی چ جاران ب پلەیا دویێ رازی نابم، هەکەر نە یا ئێکێ بم بلا چ جاران نەبم. وی ب حێبەتی ڤە ل چاڤێن وێ یێن ژ نیشکەکێڤە ئەڤ هەموو باوەری و وێرەکی تێدا دهاتە دیتن نێڕی و پشتا خوە داییێ و گۆت: تە ژ دەستپێکێ دزانی هەستێن من بەرامبەری تە د لاوازن.. بۆچی تو رازی بووی؟ میترایێ سەرێ خوە هەژاند و بۆ ئالییێ پەنجەرەیێ چوو، ل ئاسۆیێن دوور یێن باژێری د گلۆپێن هەلکری را نێڕی و گۆت: من هزردکر ئەو ئەڤینا دناڤا دلێ من دا تێرا هندێ هەبوو تە ب منڤە گرێدەت. لێ هەر تشت بەرەڤاژی خواستەیێن من بوو. من گەرم قەستا هەمبێزا تە کر؛ لێ دێ سار خاترا خوە ژ تە خوازم.
ل هیڤیا هەلاتنا ڕۆژێ بوو، هەموو تشتێن خوە د چانتەیی دا دروستکربوون، دەمێ تێڕۆژکێن ڕۆژێ دەرکەفتین، بێ خاترخواستن وێ قەستا ئێستگەهێ شەمەندفڕی کر، ل ئێکەم شەمەندەفرا هاتی سویار بوو و بەرەڤ چارەنڤیسەکێ نەدیار چوو.
