جادده‌یێن زاخۆ دێ هێنه به‌رفره‌هكرن
زاخۆ، عه‌لی حاجی:
سه‌رپه‌رشتێ پڕۆژه‌یان ل ئیداره‌یا سه‌ربخوه یا زاخۆ بۆ رۆژناما ئه‌ڤرۆ دیار كر، د ڤێ هه‌یڤێ دا چه‌ندین پڕۆژه دێ هێنه ته‌نده‌ركرن و دبێژیت: 50% ژ وان پڕۆژه‌یان ژی د بیاڤێ جادده‌یان دا بن.
ئه‌ندازیار هێژا محه‌مه‌د، سه‌رپه‌رشتێ پڕۆژه‌یان ل ئیداره‌یا سه‌ربخوه یا زاخۆ گۆت: “پڕۆژه‌یێ به‌رفره‌هكرن و دروستكرنا گوڕه‌پانه‌كێ ل نێزیك پرا ده‌لال دێ هێته بجهئینان، كو ئێك ژ پڕۆژه‌یێن گرنگه بۆ كێمكرنا قه‌ره‌بالغیا وێ جادده‌یێ و راكرنا ترافیكلایتێ، دیسا ل تاخێ كارێز ژ ئه‌گه‌رێ هه‌بوونا پانزیخانه‌یێ و ترافیكلایتێ ل سه‌ر جادده‌یا سه‌ه‌ركی دبیته ئه‌گه‌رێ دروستبوونا قه‌ره‌بالغیێ، له‌وما د پلان دایه ئه‌و جادده‌یه ژی بهێته چاره‌سه‌ركرن و 50 هه‌تا 60% ژ پاره‌یێ پرۆژه‌یان ل زاخۆ دێ بۆ دروستكرنا جادده‌یان بیت، ب تایبه‌تی ژی ئه‌و تاخێن هه‌تا نوكه جادده نه‌گه‌هشتینێ”.
گۆتژی: “د بیاڤێ كه‌رتێ په‌روه‌ردێ ژی دا، نوكه 32 قوتابخانه دهێنه نووژه‌نكرن، دیسا كار ل سه‌ر تمامكرنا سێ قوتابخانه‌یێن ب نیڤه‌رۆ مایی ژی یێ به‌رده‌وامه و دێ هێنه تمامكرن، كو هه‌رسێ ل سه‌نته‌رێ زاخۆ نه، دبیاڤێ ساخله‌میێ ژی دا ده‌ست ب نووژه‌نكرنا پشكا هه‌وارهاتنێ و نه‌ه بنگه‌هێن ساخله‌میێ هاتیه كرن، نه‌خۆشخانا ژ دایكبوون و نه‌خۆشخانا زاخۆ یا گشتی ژی دێ هێنه نووژه‌نكرن”.
هێژای خویا ژی كر، سه‌رپه‌رشتێ ئیداره‌یا سه‌ربخوه یا زاخۆ به‌رده‌وام بزاڤان دكه‌ت، دا كو باشترین پرۆژه ل سنوورێ ئیداره‌یا زاخۆ بهێنه ئه‌نجامدان و خزمه‌تا وه‌لاتیان بهێته كرن.
