جادەیا ئێتیتێ ب 1366 داران دێ هێتە كەسككرن
سندس سالح سلێڤانەی:
سەرۆكاتیا باژێرڤانیا دهۆكێ دیاركر، پڕۆژەكێ مەزنێ كەسكاتیێ ل جاددا ئێتیتێ دێ هێتە بجهئینان و پڕۆژە ب هەڤكاریا كۆمپانیا شینال دێ هێتە ئەنجامدان و 1366 دارێن چنارێ دێ هێنە چاندن.
ل دووڤ زانیاریان، پڕۆژە ب درێژاهیا شەش كیلۆمەتران و فرەهیا نەه مەترانە دێ بیتە كەسكاتی و داروبار، گوژمێ پڕۆژێ 297 ملیۆن دینارن و ژ لایێ باژێرڤانیێ ڤە بۆ هاتینە تەرخانكرن.
هەروەسا دێ سیستەمەكێ پێشكەفتیێ ئاڤدانێ ژی بۆ پڕۆژەی دێ هێتە دانان بۆ ئاڤدانا كەسكاتی و داروباران، دیسا تۆڕەكا ئاڤرێژێ ژی بۆ نەهێلانا كۆمبوونا ئاڤێ د دەمێ بارانبارینێ دا دێ هێتە چێكرن.
ئەڤ هەنگاڤە دێ بیتە ئەگەرێ زێدەكرنا رێژەیا كەسكاتیێ ل باژێڕی و باشتركرنا ژینگەهێ و دێ دیمەنەكێ جوانتر دەتە جادەیا ئێتیتێ.
