جادە و پرێن ژ ئەنجامێ لەهیان خراب بووین دێ هێنە نووژەنكرن
ئەڤرۆ
ئامێدیێ ، مەحمود نهێلی:
ژ ئەنجامێ باران و لەهیێن ل چەند حەفتیێن بوری زیان ب چەندین پر و جادەیان ل سنورێ دەڤەرداریا ئامێدیێ گەهاندینە و تا نوكە ژی نەهاتینە نووژەنكرن و ل هند جهان ئالوزی بۆ هاتن و چوونێ دروستكرینە. رێڤەبەرێ ناوچەداریا دێرەلۆكێ ژی بۆ رۆژناما ئەڤرۆ دیاركر، ئەو جادە و پرێن ژ ئەنجامێن لەهیان زیان گەهشتیێ دێ هێنە چێكرن و نووژەنكرن و ل سەر وێ یەكێ لایەنێن پەیوەندیدار هاتینە ئاگەهداركرن.
جەبار عەبدولحەمید خەلكێ ناحیا دێرەلۆك دیار كر، پرا دچیتە چەمێ وان هەر چەندە پرەكا لاوە و نوكە هاتیە چێكرن، بەلێ لەهیان و بلند بوونا ئاڤا رووبارێ سپنە زیان گەهاندینێ و گۆت: ئەو نوكە نەشێن ل سەر وێ پرێ را دەرباز بن، چونكە لایێ دی یێ پرێ ئاڤێ بریە و پر مایە هەلاویستی و نێزیكی سێ مەتران جادە ژ پرێ نزم تر لێ هاتیە، ب رێكا پێستركێ وەلاتی هاتن چوونێ ل سەر دكەن و ئەڤ یەكە ژی بوویە ئاریشە، ب تابیەتی ژی بۆ زارۆك و مرۆڤێن دانعەمر.
ناڤهاتی داخاز ژی كر ، ئەڤ پرە بهێنە چێكرن و نووژەنكرن بۆ وێ یەكێ وەلاتی بشێن هاتن و چوونێ ل سەر بكەن و گۆت: ( هیڤی دكەین دەمێ ڤێ جارێ دهێنە نووژەنكرن هزر د بلند بوونا ئاستێ رووبارێ سپنە و دروست بوونا لەهیان دا ژی بهێنە كرن بۆ وێ یەكی زیان نەگەهنێ و ژ ناڤ نەچیت).
ل سەر ڤێ یەكێ غازی عزەت رێڤەبەرێ ناوچەداریا دێرەلۆك ب وەكالەت بو رۆژناما ئەڤرۆ دیاركر، ژ ئەنجامێ بارانێن زۆر و دروست بوونا لەهیان و بلند بوونا ئاستێ ئاڤا رووبارێ زێ و سپنە، زیانێن زۆر گەهشتنە جادە و پرێن سنورێ ناوچەداریا دێرەلۆك ب تایبەت سێ پرێن ل سەر سەر سپنە پشكەك ژێ هاتنە خراب كرن و ئاشكرا كر، وان ل سەر ڤێ یەكێ رێڤەبەریا رێك و پران ل دهۆكێ ئاگەهداركریە و ژلایێ لژنەیەكی ڤە ڤەدیتن بۆ هاتینە كرن و دێ د دەمەكی نێزیك ئەو پر هێنە نووژەنكرن و گۆت: (ئەو پرا دچیتە گوندێن سپیندارێ و مژێ كو پتر ژ هەموویان زیان بەركەفت بوون، نوكە دەست ب چێكرنا وێ ژی هاتیە كرن و دهێنە نووژەنكرن).
دهێتە زانین ژ ئەنجامێ بارانێن زۆر و لەهیان و بلندبوونا ئاستێ ئاڤا رووباران زیانێن زۆر گەهاندینە دەڤەرا ئامێدیێ ب گشتی ب رەنگەكی ل سنورێ دەڤەرداریا ئامێدیێ چار پر بن ئاڤ ببوون كو هەموو دكەڤنە سەر رووبارێ سپنە و زیانێن زۆر گەهشتینێ و هەموو پێدڤی ب نووژەنكرنێ نە، ب تایبەت رێیێن هەردو لایێن پران و پەرجانێ رەخێن وێ، هەروەسا زیان گەهشتیە چەندین جهێ گوزاری.
ل ناوچەداریا بامەرنێ هەر ژ ئەگەرێ بارانێن زۆر زیانێن ماددی یێن مەزن پەیدابووینە و چەندین ترومبێلێن وەلاتیان ب ئاڤێ دا چوبوون و ئاڤ چویە د مالێن وەلاتیان دا، دیسان ل سەنتەرێ ئامێدیێ ئاشێ پرا عیسێ زیانێن مادی گەهشتینێ و هەژمارەكا رێیان ژی خراب بووینە.
