جارەكا دی، دەستكاریكرن د فۆلكلۆریدا
حجی جعفر
درۆژناما ئەڤرۆدا ژمارە (3469 ) رۆژا 30 /1 / 2024 من گۆتارەك رەخنەیی لسەر وێ چیرۆكا دگۆڤارا سڤۆرەدا، ژمارە (283 )، 2023 یا بناڤونیشانێت ( پارێن ئاڤێ و پارێن شیری) هاتی، نڤیسی بوو، ئەو ڕەخنە بۆ هندێ بوو كو ئەو شاشی دووبارە نەبنەڤە، لێ مخابن ئەو شاشی بەردەوام دووبارە دبنەڤە!
ڤێجارێ ژی دگۆڤارا سڤۆرەدا ژمارە ( 288 )، 2024، چیرۆكەكا فولكلۆرێ زارۆكان بناڤونشیانێت (چویچك و ستریكێ بنێ پێ) لبن ناڤێ (ئا . مەتا ڤیان) هاتیەخوار، هەمان شاشی دووبارە بوینەڤە، بۆ نموونە:
ل دەستپێكا چیرۆكێ نڤیسەرێ گۆتیە، (جارەكێ ژجارا سلاڤ ل هەمی خوێندەڤان و گوهداران…. !).
هەكە ئەڤ چیرۆكە یا فولكلۆری نەبایە، كەسێ ڕەخنە لسەر ڤێ خالێ ل ئامادەكارا چیرۆكێ نە دگرت، لێ چونكی چیرۆك یا فولكلۆریە، لەوما دێ بێژینە ئامادەكارا چیرۆكێ ستۆپ، نابیت تو كلیلا ڤەكرنا دەرگەهێ چیرۆكا فولكلۆرێ زارۆكان بشكێنی، چونكی چیرۆكا فولكلۆرێ زارۆكان ب وێ كلیلا تە ئینایی ڤەنابیت، چیرۆكا فولكلۆرێ زارۆكان بڤێ كلیلا خوارێ ڤەدبیت: (جارەكێ ژجارا، ڕەحمە ل دەیبابێت گوهدارا). یان ( هەبوو نەبوو، كەسی ژ خودێ مەزنتر نەبوو).
چەوا چیرۆكا فولكلۆری كلیلا خو یا ڤەكرنێ هەیە، هەروەسا كلیلا گرتنێ ژی هەیە.
خالا دوویێ یاكو فەر لڤێرە بێتە گۆتنێ ئامرازێ كۆمكرنێ( ێن) بچ رەنگا نابیت بێتە دناڤ فولكلۆرێ دەڤەرا بادیناندا، چونكی فولكلۆرێ دەڤەرا بادینان ب ئامرازێ(ێت) تێتە كۆمكرن.
فولكلۆر نە وەكو نڤیسینا تایبەتە، نڤیسەری چەوا دڤێت دێ نڤیسیت.
