جاسم شەعبان: ب پشتەڤانییا پارێزگارێ دهۆكێ دێ پشكدارییەكا سەركەفتی كەین
بۆ ماوەیێ هەیڤەكە تیما تەپا پێی یا یانەیا تەناهی بەرهەڤییان بۆ وەرزێ نوو یێ خولا پلا ئێكا كوردستانێ دكەن ب كۆمەكا ئاستەنگان ژ وانا نەبوونا داهاتیەك و ژلایێ دارایی ڤە د ئاستەكێ خراب دانە، سەرۆكێ یانەیا تەناهی جاسم شەعبان ب گەشبینی ڤە پشتگەرمییا خوە ب سۆزا پارێزگارێ دهۆكێ گرێداییە كو دێ نێزكترین دەم پشتەڤانییا دارایی لێ كەن.
ل دۆر ڤێ یەكێ ناڤهاتی دووماهی پێشهاتیێن یانەیا خوە بۆ رۆژنامەیا ئەڤرۆ دیار كر و گۆت: سەرباری ئاستەنگێن كەفتینە د ڕێیا مە دا لێ وەكو كارگێری مە هەمییان رژدی ل سەر پشكدارییەكا سەرفەرز كرییە و بلندكرنا ناڤێ یانەیێ یە، ژبەركو ل وەرزێ بۆری ب زەحمەت و كاودانێن نە خۆش مە دەربازكرن هەتا تیما مە ژ پلا دو هاتییە پلا ئێك، لەوما بۆ وەرزێ نوو مە چەندین بزاڤ كرینە و داخواز ژ لایەنێن پەیوەندیدار هاتیە كرن ژ وانا بەرێز عەلی تەتەر پارێزگارێ دهۆكێ كو پشتەڤانییا دارایی ل تیما مە بكەت ژبەر كو دگەل یانەیا سێمێلێ نوونەرێن پارێزگەهێ نە د خولێ دا، داخوازییا مە ب بەرسڤەكا دلخوەشكەر هاتییە دان كو دبیت هەتا سەرێ ڤێ مەهێ پشتەڤانییا دارایی بهێتە دان، هەرچەندە ژبەر كو دڤێت بەری خولێ بەرهەڤی بهێنە كرن مە گرێبەست دگەل چەند یاریزانان ئیمزاكرییە ب مووچەیێن گەلەك كێم پێخەمەت تیما مە بەرهەڤبیت و بۆ وان هاتییە دیاركرن كو هەردەمێ پشتەڤانییا دارایی ل مە هاتە كرن دێ مووچە ژی بۆ هێنە دان.
ژلایەكێ دووڤە جاسم شەعبانی ئەوچەندە ژی دیار كر پشكدارییا وان و دانا مووچەیی بۆ یاریزانێن تیمێ كو هەمی ژی كوڕێن پارێزگەهێ نە ب پشتەڤانییا دارایی یا پارێزگارێ دهۆكێ یە و هەكە چو پشتەڤانی بۆ نە هاتە كرن، ئەو نەچارن د كۆنگرەیەكێ رۆژنامەڤانی دا بڕیارەكێ بدەن پشتی ژ پشتەڤانییا دارایی بێ هیڤی دبن.
