جاسم قانسۆ: هەولێرێ ب سەركەڤتیانە قارەمانی بڕێڤەبر
قەیس وەیس:
د داخویانیەكێ دا جێگرێ سەرۆكێ فدراسیۆنا بادمینتۆنا جیهانی یێ لوبنانی جاسم قانسۆ كەیفخوەشیا خوە دیاركر ب مێڤانداریكرنا هەولێرا پایتەخت ب مێڤانداریكرنا قارەمانییا رۆژئاڤا ئاسیا و ب سەركەڤتیانە دا زانین.
زێدەتر ناڤهاتی گۆت: هەرچەندە قارەمانییا رۆژئاڤا ئاسیایە بتنێ هژمارەكا كێم یا هەلبژارتییان پشكداربوون كو دكەهشتنە هەشت هەلبژارتی لێ یا گرنگتر ئەوبوو مێڤانداریكرنا سەركەڤتی و هەڤڕكیێن بهێز دناڤبەرا پشكدارن و ئەڤە ژی دەنگۆباسەكێ باشیێ یە كو باژێرێ هەولێر شیانێن پشكداریێ بۆ هەر قارەمانیەكا مەزن هەنە، پێشتر مە پێزانین هەبووینە هەرێما كوردستانێ شیایە قارەمانیێن مەزن یێن وەرزشێن جودا مێڤان بكەت و ب سەركەڤتیانە.
هەروەسان ناڤهاتی گۆت: بۆ من جهێ دەستخوەشیێ بوو ئەز ڤێ پێشكەڤتنا وەرزشێ ل كوردستانێ ببینم ب هەبوونا ژێرخانەیا وەرزشی یا پێشكەڤتی و رویێ ئارامیێ و ئاڤەدانیێ، وەرزش ل كوردستانێ پێشكەفتییە و پشكدارییا هژمارەكا زوور یا یاریزانێن كوردستانی بەلگەیێ ڤێ چەندیێ لەوما ژی دبینم دێ ئەڤ یارییە پتر ل كوردستانێ پێشكەڤیت دگەل پشتەڤانیێ بۆ یاریزانان.
ژلایێ خوەڤە خلۆد بیتاری جێگرا سەرۆكێ فدراسیۆنا هەمان یاری یا ئاسیایی گۆت: سۆپاس بۆ حوكمەتا هەرێما كوردستانێ و ئیراقێ بۆ مێڤاندارییا سەركەڤتی، ئەڤێ پێنگاڤێ گەشبینی بۆ مە پەیداكر كو هزر د هەبوونا ڤاڤارتنێن كێشوەرێ ئاسیا و قارەمانی ل سەر ژیێن جودا ل كوردستانێ بكەین.
بۆ زانین ل ئەینییا بۆری هەڤڕكیێن قارەمانیێ ب دووماهی هاتبوون ئەوا هەلبژارتیێ ئیراقێ ب سەركێشییا یاریزانێن كوردستانی 14 میدالیێن ڕەنگین ب دەستڤە ئینابوو، شەش زێر، چار زیڤ و چار برۆنزی یێن ئاستێ كوڕان و كچان ل هەولێرا پایتەخت بۆ ماوەیێ حەفتیەكێ بەردەوام بوو.
