جاسم محەمەد حاجی: كەمپێ راهێنانێ ل دووڤ داخوازیا راهێنەرییە و گەشبینن ب تیما خوە
د داخویانیەكێ دا سكرتێرێ یانەیا دهۆك یا وەرزشی و رێڤەبەرێ تیما فوتبۆلێ دیار كر كەمپێ راهێنانێ ل دووڤ داخوازییا راهێنەرێ تیمێ بوو و گەشبینن بۆ وەرزێ نوو باشتر بهێنە دناڤ هەڤڕكیێن خولێ دا، ئەوا بڕیارە وەرزێ نوو یا خولا ستێرێن ئیراقێ ل 20ێ ڤێ مەهێ بهێنە ئەنجامدان.
زێدەتر جاسم محەمەد حاجی بۆ رۆژنامەیا ئەڤرۆ گۆت: هەرچەندە مە بەرهەڤیێن كارگیری دكرن كو تیما خوە یا فوتبۆلێ بەر ب كەمپەكێ راهێنانێ یێ توركیا ببەین، لێ ژبەر گیرووبۆنا ڤیزەیا یاریزانێن پیشەكار تایبەت یێن ئەفریقی و كورت بوونا دەمی، راهێنەرێ تیمێ مەسعۆد میرال داخواز كر كەمپە ل هەولێرا پایتەخت بهێتە دانان و بەرنامەكێ رێكخستی بۆ دانا، دیسان چەند دخوازی ژی كربوون پێخەمەت سەركەفتنا كەمپێ راهێنانێ، لەورا ژی هەر داخوازییەك یان پێدڤیەكا كادرێ راهێنانێ بۆ تیمێ دڤیایی مە بەرهەڤكریە، هەروەسان سۆپاسییا ئۆمێد خۆشناو پارێزگارێ هەولێرێ و یانەیێن ئالا و هندرین بۆ بەرهەڤكرنا یاریگەهێن خوە دیسان ئۆتێلا ڕامادا ئەوا هەڤكاری دگەل مە كری.
هەروەسان ناڤهاتی دیار كر ل دووڤ بەرنامەیێ كادرێ راهێنانێ چار یاریێن هەڤالینی د ناڤ پلانا وی دا هەنە هەتا نوكە دگەل هەردو یانەیێن كەرخ و كارەبا هاتینە كرن و دیسان دێ دگەل یانەیێن هەولێر و نەفت كەت و گۆت: ئەم دێ چاڤەڕێ ڕاپۆرتا كادرێ راهێنانێ بین پشتی ب دووماهی هاتنا كەمپێ راهێنانێ ل سەر راسپاردا وان دێ پێكهاتیێ خوە دیاركەت و هەكە خواست یاریزانەكی زێدەبكەت دێ بۆ پەیداكەین.
دهێتە چاڤەڕێ كرن ل یاریگەها یانەیا دهۆك یا وەرزشی ڕێورەسمێن ڤەكرنا وەرزێ نوو یا خولا ستێرێن ئیراقێ یا فوتبۆلێ ب ئاهنگێن جودا بهێتە رێكخستن، پشتی فیدراسیۆنا فوتبۆلا ئیراقێ ل سەر داخوازیا یانەیا دهۆك بۆ ڕاكرنا پەردێ ب ئاهنگەكا قەشنگ بۆ دەستپێكرنا خولێ دانیت.
