جاسم محەمەد حاجی: كەمپێ هەولێرێ دێ مفادارتر بیت ژ یێ توركیایێ
دوهی شاندێ یانەیا دهۆك بەر ب هەولێرا پایتەخت ب رێكەفت ژبۆ دانانا كەمپەكێ راهێنانێ یێ تیما تەپا پێی خوە بەرهەڤكرن بۆ وەرزێ نوو یێ خولا ئیراقێ یا پیشەكاران ئەوا بڕیارە هەڤڕكیێن وێ ل دووماهییا چرییا ئێكێ یا بهێت دەستپێبكەت.
ل دۆر زانیاریێن ڤێ كەمپێ جاسم محەمەد حاجی سكرتێرێ یانەیا دهۆك بۆ رۆژنامەیا ئەڤرۆ گۆت: پشتی كارگێرییا یانەیێ دگەل كادرێ راهێنانێ گەنگەشەكرین ل سەر دانانا كەمپەكێ راهێنانێ، ل دووڤ پێدڤی و مفا وەرگرتنا كادرێ راهێنانێ بڕیار هاتە دان ل جهێ كەمپا بۆ وەلاتێ توركیا بهێتە گوهۆڕین بەر ب هەولێرا پایتەخت بچین، ئەڤچەندە ژی ژلایێ چەستەیی و هونەری و هەبوونا چەند تیمێن دی یێن ئیراقێ ل هەولێرێ دێ مفادارتر بیت ژ ئەوێ كەمپا د هاتە پێشبینیكرن ل وەلاتێ توركیا بهێتە دانان، لەوما یا گرنگ د بەرژوەندییا تیمێ دا هاتییە كرن و كەمپەكێ هەتا 10 رۆژان بەردەوام بیت دگەل ئەنجامدانا دو هەتا سێ یاریێن هەڤالینی ژی بكەین ژبۆ باشترین بەرهەڤی بۆ وەرزێ نوو یا خولا ئیراقێ یا پیشەكاران.
هەروەسان ناڤهاتی گۆت: هەر تشتەكێ پێدڤی بۆ كەمپێ هەولێرێ هاتییە بەرهەڤكرن پێخەمەت یاریزانێ مە ب شێوەیێ دەرۆنی و ئاستی باشتر بیت و نێزكبوونەكا باش د ناڤبەرا واندا ژی پەیدابیت، ل دووڤ ئەوێ بەرنامەیێ كادرێ راهێنانێ رۆژانە دێ دو یەكەیێن راهێنانێ هەبن ئەوا پلانەكا تایبەت رێكخستی بۆ هاتییە دانان بتنێ د رۆژانێن یاریان دا نەبیت كو دێ جودا بیت، ب هیڤی نە ل دووڤ ئەوێ ئارمانجا بۆ هاتیە دان مفایی ژێ وەربگرین و تیمەكا رێكخستی و ب هێز بۆ خولێ بهێتە بەرهەڤكرن.
