جدیدانێ
عارف حیتۆ
شاعره‌كی.. ب هه‌ستێن هه‌لچوویی
په‌یڤ ئێك ئێكه ڤاڤارتن و ب ته‌وقایی
خستنه به‌ر داد و بێدادی یا قه‌پانێ
هنده‌ك حه‌زێن نیڤ هه‌لگرتی و
هه‌می هه‌لویستێن ب ژینێڤه ته‌بگرتی
ب وێره‌كی به‌ردانه ناڤ گۆڕه‌پانێ
مێرانیێ خوه دادا هنداڤ پێنگاڤا و
ره‌ونه‌قێ دده‌ت ته‌ڤی پێكۆل و بزاڤا
ئوو.. هێشتا ئه‌م یێ ل به‌ر “كابانێ”
گه‌ڕیده‌كێ كاسۆلیكی،
یاری و یاریۆكێن بێ داوی رسوا كرن
زه‌ڤی یێن به‌یار و پیشه‌یێن ده‌م ب سه‌رڤه‌چووی
هه‌می مزگه‌فتێن ژ سینگێ چیای قیت بووی
مێرچاكێن ده‌ست ب خه‌نجه‌ر و ڕم د زكی چووی
ل سه‌ر كه‌ڤران نیگار دكرن..
چه‌ند سیخوڕان خوه گه‌هاندێ و تویركێ هه‌والان ڤه‌كرن:
– پۆرێ كچه‌كا بووی، ناڤێ وێ یا كریه زه‌هرا
– مامێ ئیسڤ ژ حه‌جێ زڤڕی
– په‌زێ خه‌مۆی گورگ به‌ربوویێ
– باگوردانێ مالا سرمێ بێ ده‌ستكه
– دلشێری ل سه‌ر نۆبا ئاڤێ، مێرخاسه‌ك كوشت
– حه‌جی بلبل یێ بوویه صنگ ل به‌ر كۆتانێ
– ژنا ته‌مۆی یا هاتیه به‌ر به‌ردانێ، كو دوهی ب شه‌ڤ
د گه‌ل گیانێ شاعره‌كی چووی دیلانێ
هێشتا پێكێ من یێ سیێ ڤالا نه‌بوویی
خه‌و بوو سه‌رمیرا مه‌یدانێ
ئه‌و شاعرێ ل به‌نده‌مانا ژڤانی، چاڤ قه‌رمین
گاڤێن وی یێن هێواش هێواش
یێ پێشڤه دچن به‌ر ب خه‌وین و نه‌مانێ!
كانێ خه‌مۆ.. كانێ سرمێ؟!
كا دلشێر و حه‌جی بلبل كو ببینن جدیدانێ؟!
*
یاكۆبێ ژار.. رۆندك ژ چاڤان درژیێن خوین
هه‌رده‌م ل به‌ندا گورگانه
نۆچه‌یه‌كا ژ ره‌نگێ خه‌ونێ یان دایلانێ
بۆ بهێت و به‌رسفكا مالێ پڕكه‌تن گول و گولزار
برایێن یوسڤی هاتن ب خه‌نده و كه‌نین
سه‌ركه‌فتنه‌ك د چاڤان دا شكه‌ستی و مه‌لیل
سه‌رهاتیا كێلبێن گورگان كرنه بلیل
نه‌بێهنا یوسڤی ژ خوینا مه‌هی دهات و
نه خه‌ونا مت.. دبوو مێڤانێ گورگێ هار
ئه‌رێ ما یا پێدڤیه..
ئاهه‌نگه‌كێ ژبۆ ڤێ ده‌ستكه‌فتێ ساز بكه‌ین؟!
ما ده‌ستكه‌فته، سه‌ركه‌فتنا ل سه‌ر برای؟!
مێزێن مه‌یێ د رێزكری بوون
كه‌نیزه‌ك كه‌فتن سه‌مایێ و ده‌نگێ ده‌فێ
دگه‌هشته دوولكێ دنیایێ
من قورچه‌كا گوڕیێ ب گه‌وریا هشكدا به‌ردا و
ڤه‌گه‌ریامه د ناڤ خه‌ونێ دا
ئه‌وێ خه‌ونا جان دایه جه‌نده‌كێن مرار
ئوو ئه‌ڤ شعرا ب زه‌مهه‌ریرێ بوویه جه‌مه‌د
كره د له‌پێ حۆریه‌كا به‌هه‌شتێ دا و
پاشی د ده‌ستان دا بوو رووبار!
یاكۆب ژی، به‌ر ب خه‌مێ ڤه چوو
ئه‌وێ خه‌ما ژێ ستاندی مه‌ژێ هشیار
نزایه‌كا دلسۆژانه، به‌ر ب ئاسمانی بلند كر
ده‌نگێ برایێن یوسڤی لێ ڤه‌دگێرا و
ته‌نا نه‌دبوو دلێ دلیار
*
