جـــارا ئێــكێ

رەمەزان ئیسماعیل گەرەگوهی

جارا ئێكێ.. من تو دیتی
تو..
میناكا گولەكێ بووی
هند یا ڕند و ژێهاتی بووی
ل ناڤ كۆما
سەد خاتوینا ڕوونشتیبای
یا دیاربووی.. كو ئەڤە تووی
ب وان ڕویێن
مینا كولیلكێن بهارێ
ب وێ بەژن و بالا بلند
مینا شتلەكێ چنارێ
ل ناڤ گیای
ل ناڤ دیمەن و لاتێن چیای
ل ناڤەندا وارێ دێرین
ل سەر پشتا ئاخا زێڕین
تو دگەڕیای
خوەزی ب تنێ تە زانیبا..!
چەوانەكێ ژ دل و ئێقین
من تو دڤیای
تە دیتبا..!
دەمێ هەڕۆژ
ب جوانترین جلێن كوردی
تە خوە كار دكر
ب وان بێهنێن
گەلەك خوەش و
مسك و هێل وعەنبەرانڤـە
خوە دیار دكر
ب وان لێڤێن تەنیلاسك و
ژێهاتی یێن ‌خودێ داین ڤە
ب ڕویشیك وقەرەپۆشی و
دەستمالێن سۆر
تە خوە زێدە خویل وخوار دكر
جارجاران ژی..
ب وێ قامەتا
شۆخ و شەنگ و هەلكێشای ڤە
ژ ڤی ئالی بۆ ئالیێ دی
تە بەژنا خوە لەنجە و لار دكر
ب وێ جوانیێ
ل هەلكەفت و بیرەوەریا
تە خوە د هەژاند و سەما دكر
ب هەمی ڕەنگا
تە بزاڤا تەركا كۆڤان وخەما دكر
من ژ دلێ خوە وەسا دڤیای
هەر وەكی تو
بشەڤ و ڕۆژا دگەل من دژیای
لەوڕا ئەز ژی..
ل داویێ دێ بێژمە تە
ب دیتن و جوانیا تە و
وێ شەفەقا مینا هەیڤێ
ل شەڤێن تاری
بلند دبیت ژ ئەنیا تە
ب هەبوونا تە و
هەمی كولیلكێن بهارێ
ل ناڤ سەیرانێن ئادارێ
دێ هەروهەر
بشكڤم و پتر گەش بم
ب گەهەشتنا تە دگەل ڕۆژێ و
ژ دیتنا تە ل جارا ئێكێ
هێژتا پتر..
ب وە كەیفخوش بم.

کۆمێنتا تە