جـوانترین سكـالا ئەڤ سـالە هـاتیە تۆماركـرن
هەولێر، قائید میرۆ:
ئەندامەكێ داخوازكارێ گشتی سكالایەك ل سەر وا كەسێن ب شێوەیەكێ خراب تۆڕێن جڤاكی بكار دئینن تۆمار كریە و بسپۆرەكێ قانوونی ژی دبێژیت: هەكە رەوش یا هوسا بیت و تورێن جڤاكی نەهینە كۆنتڕۆلكرن دێ كارەسات ب سەر مللەتێ مەدا هێن و بڤی شێوەی هەتا سێ چوار سالێن دی كچێن پازدە سالی دناڤ خێزانێ نامینن و دێ داخوازا شوقا سەربخۆ كەن.
عەلی سەلیم بابان، بسپۆرێ قانوونی بۆ رۆژنامەیا ئەڤرۆ دیار كر، خراب بكار ئینانا تۆڕێن جڤاكی بووینە ژێدەرێ ئاریشەیان دناڤا جڤاكێ مەدا حەفتیا بۆری بتنێ سێ حالەتێن تەلاقدانێ بۆ من هاتینە و ئەگەر ژی بكارئینانا تۆڕێن جڤاكیە و گۆت: (ئەڤە ژی كارەساتە ب سەر مللەتێ مەدا دهێت كو بتنێ د ئێك حەفتی دا سێ حالەتێن تەلاقێ هەبن ئەڤە تنێ لدەف ئێك پارێزەری).
بسپۆرێ قانوونی دا زانین ژی كو ئەو سكالایا بەری ماوەەكی ژلایێ ئەندامەكێ داخوازكارێ گشتی ڤە هاتیە تۆمار كرن ل سەر وان كەسێن تۆڕێن جڤاكی خراب بكار دئینن بتایبەتی ئەو كەسێن ل تیك تۆكێ بووینە مەترسی ل سەر جڤاكی و گۆت: (ب دیتنا من ئەو سكالایا هاتیە تۆمار كرن جوانترین سكالایا ئەڤ سالە بوویە هاتیە تۆماركرن، چونكە هەكە رێگری نەهێتە كرن و رێكارێن قانوونی نەبن دێ مللەتێ مە بەر ب مەترسیێن مەزنتر بچیت، ژبەركو ئەڤرۆ سۆشیال میدیا و تۆڕێن جڤاكی مەترسیەكا مەزنن ل سەر رەوشت و تیتالێن كوردەواری و جڤاكی، ئەو رەفتارێن ل تۆڕێن جڤاكی دهێنەكرن ب هیچ شێوەیەكی دگەل كەلتوورێ مە ناگونجن، بەرۆڤاژی بووینە ئەگەرێ تێكدانا شیرازا خێزانێ و چەندین كارەسات پەیدا كرینە، بتایبەتی ل سەر سنێلەیان مەترسیەكا مەزنە).
ل گورەی زانیاریێن دووڤچوونا رۆژناما ئەڤرۆ ل چەند رۆژێن بۆری ژلایێ هێزێن ئەمنیڤە هژمارەكا كەسان هاتینە دەستەسەر كرن یێن رۆژانە ب رێیا تیك تۆكێ مامەلەیێن خراب دكەن و بووینە ئەگەرێ تێكدانا رەوشتێ خەلكی، ئێك ژ وان كەسێن هاتیە دەستەسەر كرن ب شێخێ تیك تۆكێ دهێتە نیاسین، داخوازكارێ گشتی ژی چاڤدێریا وان كەسان دكەت یێن بشێوەیەكێ خراب تۆڕێن جڤاكی بكار دئینن.
عەلی سەلیم بابان پشنیار دكەت كو هەكە ڤەكرن و بكارئینانا هندەك تۆڕێن جڤاكی ببیتە فلتەر و ب پارە بهێنە ڤەكرن، چونكە هەكە سناپ و تیك تۆك ببنە پارە دێ كێمتر هێنە بكارئینان هەموو كەس ژی نەشێن بكار بینیت، ل وەلاتەكێ وەكی ئیرانێ هەموو ئەو تۆڕێن مەترسی هەین ب پارە دهێنە ڤەكرن و لبن چاڤدێریێ نە و گۆت: (ئەز پێشبینی دكەم ئەگەر رێگری نەهێتە كرن هەتا سێ چوار سالێن داهاتی ئەم دێ گەنجێن خوە ژ دەست دەین و جارەكا دی ناڤەگەڕن و دێ كارەساتێن زۆر مەزن ب سەر جڤاكێ مەدا هێن، كار دێ گەهیتە وێ چەندێ كچ هێشتا نەگەهشتیە تەمەنێ پازدە سالیێ دێ داخوازێ شوقا سەربخۆ كەت ئەڤە ژی كارەساتە بۆ جڤاكێ مە، ئەڤە ژبلی مەترسیێن كوشتن و تەلاق و جودابوونا ئەندامێن خێزانێ).
