جـوداهییا د نـاڤبەرا كـاندیدێـن مـە و یێن دی دا
نڤێسین: پ.د.ئیبراهیم ئەحمەد سمۆ
ئەنجامدانا هەلبژارتنان ل ژێر ئاڵایی پارتی دیموكراتی كوردستان، تنێ پێنگاڤەكا سیاسییا دەربازبوونێ یان هەڤڕیكییەكا كەڤنەشۆپا هەلبژارتنان نینە. لێ ئەركەكێ دیرۆكی یە و بەرپرسیارەكا مەزنا نیشتمانی یە. هوین، گەلی كاندیدێن ژن و مێر، نە بەس نوینەراتییا خۆ دكەن، لێ د هەمان دەمدا نوینەراتییا حزبا رەسەنا دێرین ژی دكەن، ئەو حزبا كو شەنگستێن دەولەتا مودێرن دامەزراندی، و هەلگرێ میراتەكێ دویر و درێژێ خەبات و قوربانیدانێ یە. هەر پەیڤەكا هوین دبێژن، هەر هەلوەستەكێ هوین دگرنەبەر، بەرانبەر هەوە و حزبێ دهێتە هژمارتن و د دیرۆكا وێ دا دهێتە تۆمار كرن، تایبەت ل ژێر رۆناهییا رووماڵا بەرفرەها میدیایی دا كو چاڤدێرییا هەمی هویركاری یێن دیمەنی دكەن.
پارتی دیموكراتی كوردستان، ل سالا 2003ێ ڤە، خۆ سەلماندی یە كو دژوارترین هژمارە د هەڤكێشەیا دناڤبەرا ئیراق و كوردستانێ دا. هەروەسا ئالییەكێ ئێكلاكەرە د هەر پرۆسەكا سیاسی و یاسا دانانێ دا. هەر د هەلبژارتنێن 2005ێ هەتا ئەڤرۆ، حزب ب بەردەوامی ژمارەكا نەگۆر و جێگیر مایە و هەڤسەنگی راگرتی یە و بەردەوامییا پرۆسەیا سیاسی مسۆگەر كری یە. ئەها ل ڤێرە، كاندیدبوونا هەوە ل بن ناڤێ وێ دا، ئانكو هەم شەرەفمەندی و هەم بەرپرسیارەتیێ د هەمان دەمدا هەلدگریت و هەر دەنگەكێ هوین بدەستڤە دئینن پێگەهێ حزبێ بلند دكەت و شیانا سەركردایەتیكرنا قۆناغا داهاتی ب سەرۆكاتییا سەرۆك مەسعود بارزانی زێدە دكەت.
ژ بۆ هوین د ڤی ئەركی دا بسەركەڤن، رێبەرنامەیێن بنەڕەتی هەنە دڤێت پێگیری پێ بهێتە كرن، چونكی مینا كۆمپاسەكێ كار دكەن كو گاڤێن هەوە بەر سەركەفتنا شەرەفمەندانە رێنمایی دكەت:
ئێكەم: پێگیری بوون ب رێنمایێن حزبێ.
هوین نە كاندیدێن سەربەخۆنە، لێ كاندیدێن پارتی دیموكراتی كوردستانن. هێزا هەوە یا راستی ژ ئێكرێزی و هەڤگرتنا هەوە د بن سیبەرا حزبێ دا دهێت. پێگیریێ ب رێنمایێن وێ بكەن، و روویێ وێ یێ گەش ل همبەری میدیایێ و جەماوەری دا دیار بكەن. هەر چالاكی یان دیدارا هوین پشكدار دبن، پێدڤییە ببیتە رەنگڤەدانا وێنەیێ حزبێ و دەستكەفتێن وێ.
دو: هەڤسەنگیا میدیایێ.
د جیهانا ئەڤرۆ دا راگەهاندن چەكەكێ بڕیاردەر و ئێكلاكەرە، دكاریت د جهدا هەوە بلند بكەت یان تێكبدەت، پەیڤێن خۆ ب باڵداری بهەلبژێرە، ب كورت و ئارام باخڤە، فوكەسێ ل سەر دەستكەفتێن حزبێ و سەركردایەتییا وێ د پاراستنا دەستكەفتێن كوردستانێ دا بكە. ل بیرا تە بیت كو هەر چڤین و داخۆیانییەك ئەزمونەكا راستەقینەیە ژ بۆ هوشیاری و بەرپرسیارەتییا هەوە.
سێ: هزركرنا ب كۆم بەری یا تاك.
سەركەفتن نە دەستكەفتەكێ كەساتی یە، لێ دەستكەفتەكێ دەستەجەمعی یە. حزبێ هوین یێن ژ ناڤ رێزێن خۆ ژێگرتین و باوەری دایە هەوە، بلا ئارمانجا هەوە یا پێشین ب هێزكرنا پێگەه و زێدەكرنا رەسیدێ وێ یێ هەلبژارتنان بیت. هزركرن د بەرژەوەندییا حزبێ، ل بەراهیا هەر تشتەكێ دیترێ تاكەكەسی دا دهێت، و سەركەفتنا راستەقینە ژی، د دەرچوونا حزبێ ب ئاوایەكێ ب هێزتر و كاریگەرتر دایە.
چار: پابەندبوون ب بەها و كەڤنەشۆپان.
گەلێ مە شانازیێ ب دیرۆك و بەهایێن خۆ دبەت. لەوا ئەوێ رێ نەدەنە خۆ ژ ڤی ئاراستەی لابدەن. پێگیریێ ب رژدیێ و رێزگرتنێ بكەن، ژ دانوستاندنێن جانبی دویر بكەڤن ئەوێن خزمەتا حزبێ پرۆژەیێ وی یێ سیاسی ناكەت.
پێنج: رێبازا بارزانیێ نەمر.
پارتی دیموكراتی كوردستان نە ب تنێ پارتەكا سیاسی یە، لێ قوتابخانەكا خەباتێ یە كو ل سەر بنەمایێ ئایدلۆژیا بارزانیێ نەمر هاتیە دانان. هەردەم بلا ل بیرا هەوە بیت، كو حزب ژ خوینا شەهیدان و قوربانیدانا ئازادیخوازان ژ دایك بوویە، و ناڤێ بارزانیێ نەمر وەك چرایەكێ هەر یێ هل دێ مینیت و رێنماییا نڤشان دكەت و رامانا كەرامەت و خۆڕاگریێ بیر دئینیت.
شەش: هۆشیارییا سەرەدەریكرنێ ل گەل میدیایا نوی.
ل سەردەمێ سوشیال میدیایێ دا، پەیڤ بلەز بڵاڤ دبیت و دكاریت ل دژی هەوە بهێتە بكارئینان. هۆشیاری داخۆیانیێن خۆ بن، و ژ مژارێن ناكوكێن ل دەرڤەیی پەیاما هەوەیا هەلبژارتنان خۆ دویر راگرن. گۆتارا خۆ تنێ ل سەر مژارێن حزبێ و جەماوەری چڕ بكە.
حەفت: سەركەفتنا ب كۆم.
سەركەفتنا ژ راست نە بەس ئەوە ئێك ژ هەوە ل سەر كورسیكا پەرلەمانی روینیت، بەلكو ئەوە پارتی دیموكراتی كوردستان سەركەفتنەكا مەزن تۆمار بكەت كو دەستهەلاتا وێ یا سیاسی زێدەتر بكەت. هەر دەنگەك زێدە گاڤەكە بۆ چەسپاندنا پێگەهێ حزبێ و گەرەنتیكرنا بەردەوامییا سەرۆكاتییا وێ یە.
هەشت: ئێكگرتن و بلندییا مۆڕالێ.
هەلبژارتن ب قاسی كو شەڕەكێ هژمار و دەنگانە شەڕێ ئیرادە و مۆڕالێ یە ژی. درووشمێ خۆ بكەنە (ئێكگرتن ل پێش/الوحدە أولا)، ئیرادەیا جەماوەری موكۆمتر بكەن و بانگا پشكدارییێ بەرفرەه بكەن. مفای ژ میدیایێ و سۆشیال میدیایێ وەك مەیدانەكا كۆمكرن و هاندانێ بكەن، و ئاڵا حزبێ بلند بكەن.
نەهـ: قۆناغا چارەنڤیسساز.
هەلبژارتنێن داهاتی د دیرۆكا كورستانێ و پارتی دیموكراتی كوردستان دا قۆناغەكا چارەنڤیسسازە. سەركەفتن تێدا مسۆگەركرنا پێگەهێ سەركردایەتییا حزبێ دیار دكەت، دوڕاندن ئانكو ژ دەستدانا پێگەهەكێ سیاسیێ گرنگ. سەرەدەریێ مینا شەڕەكێ هەبوونێ ل گەل ئەڤان هەلبژارتنان بكەن، نە بەس پێشبركێیەكا هەلبژارتنان.
دەهـ: سۆز ل گەل سەرۆكی.
ل داویێ، ژبیر نەكەن هەر رەنجەكێ هوین بكێشن و هەر دەنگەكێ هوین ب دەست خۆڤە بینن نووكرنا سۆز و پەیمانێ یە ل گەل سەرۆك مەسعود بارزانی و رێبازا وی یا دیرۆكی. بلا ئارمانجا هەوە پێشكەشكرنا سەركەفتنەكا نوی بۆ حزبێ بیت و پشتڕاست بكەن كو پارتی دیموكراتی كوردستان وەك هژمارەكا بها گران و بێ ركابەرترین هێز دێ هەر مینیت.
گەلی كاندیدێن ژن و مێر، بەرپرسیارییا هەوە یا مەزنە، لێ باوەریا مە ب هەوە مەزنترە. ئەڤێ هەلبژارتنێ بكەنە دەرفەتەك بۆ نویكرنا دلسۆزییا خۆ بۆ حزبێ و رێبازا وێ، پشتڕاست بكەن كو هوین دەنگێ راستێ دیرۆكا وێ و دەستێ ب هێزێ دوارۆژا وێنە. سەركەفتنا مسۆگەرە هەر دەمەكێ مە رێزێن خۆ رێكخستن و كرنە ئێك و هەر دەمەكێ مە ژدل و ب دلسۆزی ل ژێر ئاڵایێ رێبازا بارزانیێ نەمر كار كر.
و. ژ عەرەبی: عزەت یوسف
