جلکێن هونەرمەند ئەیاز یوسڤی ژ دهۆکێ بۆ زاخۆ هاتنە ڤەگوهاستن
زاخۆ، دلۆڤان هالۆ:
دلخاز مووسا، رێڤەبەرێ ڕەوشەنبیری و هونەری ل زاخۆ د دیدارەکێ دا بۆ ڕۆژناما ئەڤرۆ دیارکر کو شاندەکێ پێکهاتی ژ ئیدارا سەربخوە یا زاخۆ و ڕێڤەبەریا ڕەوشەنبیری و هونەری ل زاخۆ و سەندیکا هونەرمەندێن کوردستانێ نڤیسینگەها زاخۆ،
د ڕێوڕەسمەکێ تایبەت و فەرمی دا خێزانەکا پارێزگەها دهۆکێ بناڤێ بەدری تۆفیق عەبدوللا جلوبەرگێن کوردی کو پێك دهێن ژ بەرگیز و چۆخکێ هونەرمەند ئەیاز یوسڤی ڕادەستی مە کر.
ناڤهاتی ئاماژە ب وێ چەندێ ژی کر کو ئەڤ جلوبەرگە ژ لایێ وێ خێزانێ ڤە هاتبوونە پاراستن چونکی ل دەمێ کو هونەرمەند ئەیاز یوسڤ بۆ کارێ کلیپ کرنا سترانەکێ یان ژی چوونا ئاهەنگ و شەهیانەکێ دچوو دەف وێ خێزانێ جلوبەرگێن خوە ل بەر خوە دکرن و بەرەڤ کارێ خوە دچوو، پشتی ژ کارێ خوە ب دوماهیك هاتبا جارەکا دی دچوو وێ مالێ و جلوبەرگێن خوە ڕادەستی وێ خێزانێ دکر، لەوڕا هەتا ئەڤرۆ ل دەف وان هاتبوونە پاراستن.
گۆت ژی:»ئەم ژی دێ ڤان جلوبەرگێن کوردی لگەل کامیرەیەکا وی سەردەمی یان دێ ڕادەستی مۆزەخانا زاخۆ کەین یان ژی دێ دانینە جهەکێ تایبەت هەم بۆ مەرەما پاراستنا ڤان جلوبەرگان هەم ژی بۆ نیشاندانێ، دا کو خەلکێ زاخۆ و گەشتیارێن نافخۆ و بیانی ڤان جلوبەرگان ببین، هەر دیسان دا نڤشێ نوو بزانیت هونەرمەندێن مە بۆ ئەنجامدانا کارەکێ هونەری گەلەك ڕەنج و زەحمەت دکێشا».
بەدری تۆفیق، کورێ توفیق عەبدوللا کو دبیتە خودانێ پاراستنا ڤان جلوبەرگان گۆت:»ئەڤ جلوبەرگێن کوردی یێن بابێ من تۆفیق عەبدوللایی بوون، ل سالێن هەشتییان هەڤالێن وی یێن هونەرمەند وەکو هونەرمەند ئەردەوان زاخۆیی و ئەیاز یوسڤ و تەحسین تەها و محەمەد عارفێ جزیری ئەڤ جلوبەرگه ل دەمێ دروستکرنا کلیپان و سازکرنا ئاهەنگ و شەهیانان کرینە بەرخوە».
