جلگێن كـوردی و تـابلۆیا مـان و نەمـانـێ
ئیمان لەزگین
جلوبەرگ بۆ هەر مللەتەكێ بتنێ پارچەكا پەڕۆكی نینە، بەلكو زمانەكێ بێ دەنگە، چیرۆكا دیرۆك و ڕەسەنیەتا وی مللەتی ڤەدگێریت. ل دەڤ مە كوردان، ئەڤ پۆشاكە تابلۆیەكا زیندییە ژ سروشتێ چیا و مێرگان، كو سالانە ل رۆژا دەهێ ئادارێ ئەم ب پۆشینا وێ پەیمانەكا نوی دگەل رەهو ریشالێن خۆ گرێ ددەین و ناسنامەیا خۆ یا نەتەوەیی ل پال زمان و ئاخێ دوپات دكەینەڤە. جوانیا جلێ كوردی، ب تایبەت یێ خانمێن كورد، د وێ تەبایی و شكۆداریێ دایە كو د ناڤبەرا رەنگ و قالبێن وێ یێن دیرۆكی دا هەی، وەكی كڕاس و فیستان و كەوا و قودك كو دیمەنێ گۆلێن بهارێ ل بەر چاڤان زندی دكەن.
لێ ئەوا ئەڤرۆ مە دئێشینیت، ئەو شەپۆلا بناڤێ «مۆدێرن»بوونە، كو خەریكە ب دەستێن نەزان، سیمایێ رەسەن یێ جلێن كوردی بەرە ب تاریستانێ ڤە دبەت. دەمێ ئەم دبینین ب ناڤێ نووخوازیا سەردەم، دەستكاری د بنیات و جەوهەرێ ڤی جلی دا دهێتەكرن، دبیتە ئەگەر كو ئەو مۆركا نەتەوەیی بەر ب حەلیانێ ڤە بچیت. تێكدانا شێوازێ درووینێ، كورتكرن یان تەنگكرنا جلی ب شێوەیەكێ كو بتنێ وەك مۆدێلەكا دەمكی دیار بیت، نەك خزمەتا كەلتووری ناكەت، بەلكو وێرانكرنا پارچەكا پیرۆزا كەلەپۆرێ مەیە. ئەركێ مە یە كو ئەم ب هشیاری ڤە بەرگریێ ژ ڤێ رەسەنیەتێ بكەین و رێ نەدەین چ میدیا یان كەنالێن راگەهاندنێ ستایلێن نە شیاو وەك جلێ كوردی نیشا بدەن.
داهێنان كارەكێ پێدڤیە، لێ داهێنانا ڕاستەقینە ئەوە كو ئەم بشێین ڕەسەنیەتێ ب نوویاتیێ ڤە گرێ بدەین بێی كو زیانێ ب بنەمایێن جلی بگەهینین. پێدڤیە ئەم فێری وێ چەندێ ببین كو جلكێن كوردی د هەمی بوون و هەلكەفتێن جودا یێن ئایینی دا، جڤاكێ و فەرمی دا بپۆشین دا كو وەك ستایلەكێ ژیانێ یێ زیندی بمینیت، نەك بتنێ وەك كەلوپەلەكێ مۆزەخانەیێ كو سالێ جارەكێ بهێتە دەرێ. ل دوماهیێ، پاراستنا جلێ كوردی، پاراستنا وێ رەنج و وەفاداریێ یە كو ب سەدەها سالانە مللەتێ مە بۆ مان و نەمانا خۆ كێشای؛ ژ بەر هندێ، دا ئەم هەمی پێكڤە بەرگریێ ژ ڤێ تابلۆیا رەنگین بكەین و نەهێلین چ مۆدێلەكا بیانی جوانییا وێ یا هەردەمی ل مە غەریب بكەت.
