جه‌لۆ بۆ ئه‌ڤرۆ نيوز چ دبێژيت؟
ئه‌ڤرۆ نيوز:
زارڤەکەرێ کۆمێدی جەلال عەبدوللای بۆ ئەڤرۆ دیارکر ب ھەلکەفتا ھاتنا ھەیڤا رەمەزانا پیرۆز وان دوھی ١٢-٧ دووماھی فلمێ خوە یێ کۆمێدی بەلاڤکریە و بۆ پشتی جەژنێ ژی ھندەک فلمێن دی دحازرن.
ناڤبری گۆت: ب گۆڕەی وێ ھەڤبەستا مە ل گەل کۆمپانیا نۆژەن و دەزگەھێ میرمیۆزک یێن بەرھەم ئینان و بەلاڤکرنا بەرھەمێن ھونەری مۆرکری، دوھی دووماھی فلمێ مە ب ناڤێ (بابێ من ھات) ژلایێ وی دەزگەھی ڤە ھاتە بەلاڤکرن و رۆلێ من دوی فلمی دا ئەز کۆڕێ ھونەرمەند خەلیل قەدشی مە، ئەو دچیتە ئورۆپا و ئەز ل ڤێرە دمینم و ل دەمێ زڤرینێ ئەو ژنەکێ ژوێرێ ل گەل خوە دئینیت و ل ڤێرە کیشە پەیدا دبیت.
دووڤدا گۆت: من پێ باشبوو وەکو رەمەزانێن بۆری من بەرنامێ خوە یێ پرسیار و خەلاتان ل ڤین تیڤی پێشکێشکربا، لێ ژبەرکو ئەو کەنال یێ چوویە ھەولێرێ، لەورا دا بۆ من ژی یا ب زەحمەت بیت رۆژانە ھاتنۆچوونێ بکەم، لێ نوکە شەڤانە ل مازی مۆل ئەز بەرنامەکێ ھونەری پێش کێشدکەم و ھندەک پێشانگەھێن ل وێرێ خەلاتان پێشکێشی خەلکی دکەن.
دووڤدا گۆت: ئەز دانپێدانێ دکەم کارێن مە یێن بەرێ گەلەک باشتر بوون، چونکو ل وی دەمی پتر پشتەڤانی ھەبوو، ھەروەسا گەلەک رەوشەنبیرو و ھونەرمەندێن باش ھاریکارو پشتەڤانێن مە بوون، لێ نوکە ژلایێ پارەی ڤە ئەو پشتەڤانی نەمایە و تەلەفزیۆن ژی نەشێن پشتەڤانیێ ل چێکرنا بەرھەمان بکەن، لەورا ژ نەچاری ئەڤ بەرھەمێن بازرگانی دھێتە کرن، و ب راستی ژی ئەز ژی گەلەکێ پێخۆش نینم، لێ چو بکەین ژنە چاری یە و کارێ مە ھونەرە ھەکە ئەم ویژی نەکەین دێ چاوا شێن داھاتەکی بۆ خێزانێ پەیدا کەین، سەرەرای وێ چەندێ ئەز نە ل وێ باوەریێ مە کو کەسەک بشێت ل کوردستانێ ب ھیڤیا ھونەری ڤە بژیت.
ل دووماھیێ گۆت: د رێیا رۆژناما ئەڤرۆ دا ب دەلیڤە دبینم سوپاسیا وان ھەڤالێن خۆشتڤی بکەم ئەوێن بەردەوام ھاریکار و پشتەڤانیا مەدکەن و دبێژمە وان ئەم ب ھەوە سەرفەرازین، ھەروەسا سوپاسیەکا تایبەت بۆ نێزکترین ھەڤالێ منێ ھونەرمەند (خەلیل قەدشی) کو ب راستی ئەم ب ھەڤرا دجوان و سەرکەفتی نە، و سوپاس بۆ کاک زیوەر ئیبراھیم ئۆرەیی کو بەردەوام پشتەڤانیێ ل کارێن مە یێن ھونەری دکەت.
