جه‌ژنا ب ئاگر
دبه كو وێ دایكێ له‌زدكر و د هنده‌رێ خوه ده دگۆت: “كا ئه‌ز بله‌زینم دبه كو ڤاكسیدان نه‌مینه و زارۆكێ من بێ ڤاكسیدان بمینه، هه‌ر تشت د ڤێ جه‌نگێ ده بوویه ب سنۆر!”
و دبه كو دایكه‌ك دن ژ خوه و كورێ خوه ره دگۆت: “ده كورێ من كا ئیرۆ ئه‌م هه‌رن ژ بۆ ته ڤاكسیدان بكن و سبه ئه‌م دێ ئاهه‌نگه‌كێ ژ ته‌ره چێكن، مانه سبێ جه‌ژنا ته‌یه كورێ من، ئه‌م ژی دێ ب خێرا ڤێ رۆژێ ژ ره‌وشا جه‌نگێ ده‌ركه‌ڤن و ئه‌م دێ نه‌پۆخێن ره‌نگین بنه‌پخینن و سترانان شرین بخون و گۆرانیان بێژن”
و دبه كو دایكه‌ك دن نه بدلێ وێ بوو ئیرۆ كو بچه ناڤاندا ته‌ندرووستی، لێ ژ به‌ر كو جیرانا وێ خوه‌ستبوو ئه‌و ل گه‌ل هه‌ڤ بچن و ده‌ما خوه ب هه‌ڤره ده‌رباسكن و ژ بۆ دلێ جیرانا خوه ژ خوه نه‌هێله پێره دا رێ و به‌رێ خوه دا ناڤه‌ندا مه‌یسه‌لوونێ.
لێ ب هه‌ر حالی گه‌له‌ك ژ دایكێن وان زارۆكان د خوه‌ستن سبه ب خوه‌شی بێ ژ بۆ كو هنه‌كی كێفێ تێخن دلێ زارۆكێن خوه و دبه كو هنه‌كی ده‌نگێ كێفێ ل هندرێن وا بگه‌ره ژ دێڤلا ده‌نگ و نووچه‌یێن جه‌نگ و كووشتنێ.
هه‌میان به‌رێ خوه دابوون ناڤه‌ندێ زارۆكێن خوه همبێز كربوون، ب هه‌ر دو ده‌ستان ئه‌و دابوون به‌ر سینگێن خوه دخوه‌ستن هه‌رن و ژ تشته‌كی ئه‌گه‌را بوویینا وێ هه‌یه، چووبوون وان ژ فالنجێ بپارێزن، دلێ وان ب سه‌ر زارۆكێن وان ڤه‌بوون و ژ خوه‌ره دگۆتن مالا خوه‌دێ ئاڤا هینا ژی بهنا ژیانێ ل وه‌لاتێ مه تێ د ناڤ ڤێ بازارێ مرنێ ده.
ژ ئالیه‌كی دن ڤه هن دێ چووبوون سه‌ر ئه‌ركێ خوه، جلێن ره‌نگه سپی ل به‌ر خوه كربوون مینا بووكان هه‌ر رۆژێ خوه ب جلێن سپی دخه‌ملاندن، زارۆكێن خوه ل ماله دهشتن ژبۆ كو ب هانازارۆكێن باژارێ خوه ڤه هه‌رن.
كه‌سه‌كه‌كی نزانیبوو بێ وێ چ ببه…. هه‌تا دانێ نیڤرۆ قامشلۆكا ئه‌ڤینێ ته‌ڤ ئێش و كه‌سه‌رێن رۆژانه پۆر ڤه‌كری و سه‌ربه‌ست ل چیایێن د سه‌ر خوه‌شكا خوه نسێبینێ ره دنه‌ری و دلێ وێ ژ ئۆمێدان تژه بوو، لێ ژ نشكێڤه بێهنا گۆشتێ شه‌وتی، قیرینا دایكان و دوومانا ره‌ش ره‌نگێ روویێ قامشلۆ گوهه‌رین ده‌سماله‌ك ره‌ش ب سه‌ر خوه داكر و كه‌س نه‌ما كو روندكێن وێ پاقژ بكه، دێمێن وێ شل مان نه‌ما به‌ر خوه دیت، ژ بێهنا گۆشتێ مرۆڤێن شه‌وتی پێڤه چ هه‌لم و بێهن نه‌مان.
ئیرۆ رۆژا وه‌قفا جه‌ژنا زارۆكان بوو، قامشلۆ به‌شه‌ك ژ زارۆكێن خوه ب ئاگر كرن قوربانی، قامشلۆ خوه ب ره‌نگێ ئاموودا شه‌وتی خه‌ملاند و ب ترافا زندانا هه‌سه‌كێ جاڤێن خوه كلكرن و ب خه‌مگینیه‌ك تووژ و ژ دل رۆژا خوه قه‌تاند.
شه‌واتا قامشلۆ، كاره‌ساتا قامشلۆ، هشمه‌تا قامشلۆ، په‌قینا قامشلۆ….. گه‌له‌ك ناڤ لێ هاتن كرن لێ برین یه‌كه، د سه‌ر برینێن كو هینا شوونا وان زوهانه‌بوو ل مفتیێ خوه‌راگر برینه‌ك د قامشلۆكا ئه‌ڤینێ ده ڤه‌بوو.
ده‌ردۆرا ٣٠ مرۆڤی كو پتری وان ژن و زارۆك بوون، بوون قوربانا ئاگره‌كی كو هینا كه‌س نزانه راستیا بوویه‌رێ ب ته‌مامی چیه، دیسا بوویه‌رێن ب ڤی ره‌نگی بیرانینێن خه‌مگینیێن كوردێ رۆژاڤایێ كوردستانێ یێن ب ئاگر پێچایی نووكرن و گه‌له‌ك پرس ئانین رۆژه‌ڤێ ئایا به‌رپرسیاره‌تیا كێیه گه‌لۆ؟ پاشگوهكرن كی سه‌ده‌ما وێیه؟ چما د ده‌ما كو ناڤه‌ند ژ خه‌لكێ هاتیه داگرتن وێ ئاگر ب پووشێ زوها بخن؟!!
ئه‌ڤ پرس هه‌م پێویستی به‌رسڤێ نه و ژبۆ دلێ دایك و زارۆكان رهه‌ت ببه گه‌ره‌كه ئه‌ڤ پرس بێ به‌رسڤ نه‌مینن وه‌ك پرسێن به‌ر ده‌ه سالان.
د ڤێ بوویه‌را پتر ژ خه‌مگین ئه‌ز ڤان گۆتنانا د ده‌نگێ ئاهینا قامشلۆ دا دبهیسم: “گه‌لێ من هه‌زكریێن من گه‌لێ كورد ئاخف، گه‌لێ كو وه ناڤێ من كر باژارێ ئه‌ڤینێ، ده‌ستێ هه‌ڤ بگرن ژ هه‌ڤ هه‌زبكن ئه‌ز پێویستی وه مه دا كو ئازاد ببم و خوینا زارۆكێن من بۆش نه‌چه. ”
