جوانی و ئـازارێن ژنـان د كـەڤالێن من دا رەنگڤە ددەن
بێریڤان محەمەد، كچە شێوەكارەكا كوردە ل دەڤەرا گەرمیان و دەرچۆیا پەیمانگەها هونەرێن جوانە ل كفری، د دیدارەكێ دا بۆ رۆژناما ئەڤرۆ دبێژیت: ئەڤە نەه سالن دوارێ شێوەكاری دا كاردكەم و ب رێكا چێكرنا كەڤالان پرسێن گرێدای ژنان و جوانی و ئازارێن وان د كەڤالێن من دا رەنگڤە ددەن.
هەروەسا گۆت: ئەز دبینم كارێ هونەری بۆ كچان یێ ب زەحمەتە، ب تایبەت ل دەڤەرا گەرمیان، لێ ب خۆشحالی ڤە خێزانا من هەردەم هاریكار و پشتەڤانن ژبۆ كارێ من و رەخنەیێن جڤاكی من ژ هونەری دوور ناكەن، بەلكو زێدەتر رژدبم ل سەر كارێ خوە، بۆ زانین هەتا نوكە من پشكداری د(29) پێشانگەهێن هەڤپشكدا كریە ل سەر ئاستێ عیراقێ و هەرێما كوردستانێ، هەروەسا من پشكداری د چەندین دیدار و فەستیڤالێن هونەری دا كریە و سەرپەرشتا چەندین كارێن هونەری كریە، هەروەسا ئەز سەرۆك و دامەزرێنەرا گرۆپێ هێل یێ شێوەكاری یێ خانمان ل گەرمیانم، كو ل 2023 هاتیە دامەزراندن و مە بزاڤا كری ئەوا ڤالاهیا هونەری ئەوا ل دەڤەرێ هەی ب رێیا ڤی گرۆپی پربكەین، هەروەسا مە بزاڤا كری ئەو ژنێن ژهونەری دووركەفتین دوبارە ب ڤەگەرینە ڤە، مە پێشانگەهەك ل ژێر ناڤێ (رەنگێن خانمان بۆ دیاركرنا ژیانێ) ڤەكربوو، هەروەسا حەزدكەین پێشانگەهەكێ ل دهۆكێ ژی ڤەكەین و مەپەیوەندیێن باشتر ل گەل شێوەكارێن دەڤەرا بەهدینان هەبن، دووماهی كارێ من ژی ل نێزیك دێ ب كارێ دەرهێنانا كورتە فلمەكی رابم.