جوتیار عه‌لی: ئاڤاكرنا نڤشه‌كێ نوو و پشكداری د قاره‌مانیێ دا گرنگتره ژ ناسناڤی
د داخویانیه‌كێ راهێنه‌رێ تیما یانه‌یا زاخۆ و ئه‌كادیمیا وه‌رزشی بۆ یارییا باسكێت بۆلێ دیار كر رێكخستنا قاره‌مانیا مینی باسكێت بۆ یاریزانێن ژیێن بچووك باشترین ده‌لیڤه‌یه ژبۆ تاقیكرنا ئاست و شیانێن وان و پشكداریا مه ئاڤاكرنا نڤشه‌كێ نوو یه و گرنگتره ژ هه‌ڤڕكیێ بۆ ناسناڤێ قاره‌مانیێ.
زێده‌تر جۆتیار عه‌لی راهێنه‌رێ ئه‌كادیمیا یانه‌یا زاخۆ بۆ رۆژنامه‌یا ئه‌ڤرۆ گۆت: ڤه‌كرنا ڤێ قاره‌مانیێ باشترین ده‌لیڤه‌یه بۆ تیمێن پشكدار زێده‌تر ئاستێ یاریزانێن خوه بزانیت ژبه‌ركو ئه‌ڤ قاره‌مانیه دێ بیته وه‌كو هه‌ڤكه‌تن دناڤبه‌ر یاریزانێن كوردستانێ و مفایی ژ ئاست و شیانێن ئێكودو ببینن، وه‌كو تیما زاخۆ پشكداریا مه دێ بۆ مفا وه‌رگرتنێ بیت و مه هزر د هه‌ڤڕكیێ دا نه‌كریه و ئاڤاكرنا نڤشه‌كێ نوو بوو مه گرنگتره ژ هه‌ڤڕكییا ناسناڤی و پلانا مه هه‌می یاریزان ده‌لیڤا خوه بینن، ئه‌م ده‌ستخووشیێ ل فیدراسیۆنا كوردستانێ یا ڤێ یاریێ دكه‌ین كو هزر دانانا ڤێ قاره‌مانیا تایبه‌تمه‌ند و گه‌له‌ك گرنك، چنكو دێ زێده‌تر زاخ و هیڤیێن یاریزانان ب هێزتر لێكه‌ت بۆ دیتنا پاشه‌رۆژا خوه.
ژلایه‌كێ دووڤه هشیار دۆبانكی بۆ رۆژنامه‌یا ئه‌ڤرۆ دیاركربوو به‌ری ده‌ستپێكرنا قاره‌مانیێ داخواز ژ ئه‌كادیمیێن یانه‌یێن پارێزگه‌هێ مینا دهۆك و سه‌نحاریب كربوو پشكداریێ بكه‌ن لێ به‌رهه‌ڤ نه‌بوون پشكداربن سه‌رباری هه‌بوونا نێزیكی 19 یانه‌یا پرانییا وان ئه‌كادیمی ژی هه‌نه لێ مخابن ژبلی ئه‌كادیمییا یانه‌یا زاخۆ چو ئه‌كادیمی پشكدار نه‌بوون.
بۆ زانین ب سه‌رپه‌رشتیا فیدراسیۆنا باسكێت بۆلا كوردستانێ قاره‌مانیا مینی باسكێت بۆ ژیێن لین 12 سالی ل هۆلا یانه‌یا پێشكه‌رگه ل پارێزگه‌ها سلێمانیێ هاتبوو رێكخستن ئه‌وا ب پشكدارییا یانه‌یێن زاخۆ، سۆلاڤا نوو، ده‌ربه‌ندیخان، نه‌فتا باكۆر و خه‌ونا وه‌رزشی پشكداربوون، یاریێن وان ب شێوه‌یێ خول ئێك گه‌ڕ بۆ ماوه‌یێ ئێك رۆژ یا به‌رده‌وام بوو.
