جوتیار عه‌لی: ب گه‌نجان مه هه‌ڤڕكیا باشترینێن ئیراقێ كریه
ئه‌ڤرۆ،
د دیداره‌كێ دا هاریكارێ راهێنه‌رێ تیما باسكێت بۆلا یانه‌یا زاخۆ دیاركر ئه‌وان ب كوڕێن باژێرێ زاخۆ هه‌ڤڕكیا باشترین یاریزان و یانه‌یێن ئیراقێ كرینه و ئارمانجا وان ده‌ستڤه ئینانا پلێتا چارگۆشا زێرینه.
زێده‌تر جوتیار عه‌لی بۆ رۆژناما ئه‌ڤرۆ گۆت: پشتی بۆرینا 12 یاریان و قۆناغا ئێكێ ژ خولا پلا نایابا ئیراقێ تیما مه شیایه 20 خالان ژ هه‌شت سه‌ركه‌فتن و چار خوساره‌تیا كۆمبكه‌ت و رێزا شه‌شێ بهێت، بۆ قۆناغا دویێ مه به‌رهه‌ڤیێن باش كرینه سه‌رباری دێ پێنچ یاریا ل دووڤ ئێك ژ ده‌رڤه‌یی یاریگه‌ها خوه كه‌ین، لێ ئه‌وا د قۆناغا ئێكێ دا مه پلان بوو دانایی ل گه‌ل چاره‌سه‌ركرنا خه‌له‌تیێن بوری گه‌شبینن بۆ قۆناغا دویێ به‌رده‌وام ب كوڕێن باژێرێ زاخۆ هه‌ڤڕكییا باشترین یاریزان و یانه‌یێن ئیراقێ بكه‌ین و هه‌موو بزاڤ و ئارمانجێن مه پلێتا ده‌ربازبوونێ یه بۆ چارگۆشا زێرین، پێنه‌ڤێت ئه‌ڤ ئارمانجه ژی ب سانه‌هی نابیت هه‌مبه‌ری ئه‌وان یانه‌یێن پرانیا وان یاریزانێن هه‌لبژارتیێ ئیراقێ و پێشه‌كارێن ئاست بلند ئیناینه، لێ هه‌مبه‌ری وێ هه‌موو یاریزانێن مه خه‌لكێ زاخۆ نه ژبلی دو پیشه‌كاران..
یاریا ئێكێ ئه‌ینیا بهێت تیما یانه‌یا زاخۆ دێ ل به‌غدا هه‌مبه‌ری كه‌رخێ بیت، ل 23ێ هه‌یڤێ بیته مێڤانا كاره‌با، ل دو و چارێ كانوونا دویێ یا سالا 2023 ل باژێرێ كه‌ركووك بیته مێڤانان یانه‌یێن نه‌فتا باكۆر و غازا باكۆر، ل شه‌شێ هه‌مان هه‌یڤ دێ بیته مێڤانا نه‌فت ل باژێرێ به‌غدا.
بۆ زانین 13 یانه پشكداریێ دخولا پلا نایاب دا دكه‌ن، زاخۆ ب 20 خالان رێزا شه‌شێ دهێت، نه‌فت ب 25 خالان سه‌رێ لیستێ دهێت، شورته ب 23 خالان، حه‌شد شه‌عبی 22 خال، دیفاع ئه‌لجه‌وی و دیجله ل 21 و 20 خالان رێزێن دویێ هه‌تا چارێ ل دووڤ ئێك دهێن.
