جوتیار عهلی: چو ههلبژارتیێن ئیراقێ بهێنه دروستكرن دێ یێن زاخۆ ژی دناڤ دابن
ئهڤرۆ، عهلی حاجی:
د داخویانیهكێ دا هاریكارێ راهێنهرێ ههلبژارتیێ لاوێن ئیراقێ بۆ یاریا باسكێت بۆلێ دیاركر ههر چو ههلبژارتیهكێ ئیراقێ بهێته دروستكرن دێ یاریزانێن یانا زاخۆ د ناڤ دا بن ئهڤچهنده ژی ژبهر ئاستێ وانه.
زێدهتر جوتیار عهلی بۆ رۆژناما ئهڤرۆ گۆت: ئهڤه بۆ ماوێ 11 رۆژه ههلبژارتیێ ئیراقێ كهمپێ خوه ل پارێزگهها دهۆكێ دانایی كو تێدا 15 یاریزان د كهمپێ دا نه خوه بهرههڤكرن بۆ قارهمانیا رۆژئاڤا ئاسیا ئهوا دهێته چاڤهڕێ كرن ل دووماهیا ههیڤا بهێت ل وهلاتێ سوریا بهێته ئهنجامدان ژوانا چار یاریزانێن ههرێما كوردستانێ نه كو دو خهلكێ زاخۆ نه ژبۆ دووماهی پێكهاتیێ 12 یاریزانی بڕیاره كهمپهكه یێ بهردهوام بیت ل پارێزگههێ لێ دێ چنه باژێرێ زاخۆ و دبیت كهمپهكێ دی ل باژێرێ دهربهندیخان ژی بهێته دانان، گهشبینم ههردو یاریزانێن زاخۆ جهێ خوه دناڤ لیستا سهرهكی دا مسۆگهر كریه لدووڤ ههلسهنگاندنا راهێنهر و لژنا ل گهل دا ب هیڤییا وێ یهكێ ههر چار یاریزانێن ههرێمێ جهێ خوه دناڤ تیمێ داب هێلن.
ههروهسان ناڤهاتی دیاركر بڕیاره ل 25ێ تیرمهها بهێت قارهمانیا رۆژئاڤا ئاسیا ل دیمهشقێ بهێته ئهنجامدان و یاریزانێن باژێرێ زاخۆ دێ بنه جهێ سهرنجراكێشا ئهوان ژبهركو خودان شیانن و گۆت: مه ئاستێ باسكێت بۆلا زاخۆ گههاندیه جهێ باوهریی كو ههر چو ههلبژارتیهكێ ئیراقێ بهێته دروستكرن دێ یاریزانهكێ زاخۆ دناڤ دا بیت ئهڤهژی بهرههمێ ئهوێ زهحمهت و كارێ بهردهوام یێ مهیه بۆ دانانا نڤشهكێ ئهكادیمی یێ یاریێ ل زاخۆ.
