جوتیار ل دووڤ رێژه‌یا هاتنا باران بارینێ به‌رهه‌ڤیێن خوه دكه‌ن
ئه‌ڤرۆ، هه‌رهین محه‌مه‌د:
به‌رپرسێ پشكا پلاندانانێ و دووڤچوونێ ل رێڤه‌به‌ریا گشتی یا چاندنێ دیار كر، ئاریشا وان یا سه‌ره‌كی كێمیا ئومبارێن سارن، له‌ورا نه‌شێن به‌رهه‌مێن خومالی بۆ هه‌ر چار وه‌رزان ئومبار بكه‌ن، به‌لێ ل قه‌زا به‌رده‌ره‌ش و شێخان و سێمێلێ ب رێژه‌كا باش پتات به‌رهه‌م ئینایه و ل سالا بوری رێژه‌ك ژ وان پتاتان هاتنه هاورده‌كرن بۆ وه‌لاتێن عه‌ره‌بی، لێ دهۆكێ پێدڤی ب هه‌بوونا ئۆمبارێن پتاتایه دا بۆ هه‌ر چوار وه‌رزان پتاتان راكه‌ن و گۆت: نه‌هاتنا بارانان ژ نیڤا هه‌یڤا سێ هه‌تا ده‌مێ دروینا گه‌نمی كارتێكرنه‌كا مه‌زن ل سه‌ر به‌روبومێن كێلگه‌یی كریه و هه‌كه جوداهیێ بكه‌ین ل گه‌ل سالێن بوری وه‌كو تێكرا هندی نیڤا سالێن بوری باران هاتیه و بوویه ئه‌گه‌ر ژێده‌رێن ئاڤێ گه‌له‌ك كێم بووینه. جوتیارێ مه‌ژی ل دووڤ هشكه‌سالیێ به‌رهه‌ڤیێن خوه دكه‌ن و دبیت گه‌له‌ك ئه‌ردێ وان كارتێكرن لێ بیت، چونكو ژێده‌رێ ئاڤێ كێم بوویه.
خدر دێوالی عه‌بدوللا، به‌رپرسێ پشكا پلان دانانێ و دووڤچوونێ ل رێڤه‌به‌ریا گشتی یا چاندنێ د دیداره‌كێ دا بۆ رۆژناما ئه‌ڤرۆ گۆت: مه گه‌له‌ك به‌رهه‌م هه‌نه ب درێژاهیا سالێ ئه‌م قه‌ده‌غه دكه‌ین و ناهێلین یێن بیانی بهێنه د بازاری دا، وه‌كو هنار و كڤارك و زه‌رزه‌وات ب گشتی، چونكو مه شیانه هه‌نه وه‌كو وان بچینین ل هه‌موو وه‌رزان، به‌لێ به‌رهه‌مێن دی مه ئومبار نینن ده‌مێ زێده‌بن بكه‌ینه د وان ئومباران دا بۆ ده‌مێ پێدڤی، له‌ورا ده‌مێ به‌رهه‌مێن خومالی ده‌ردكه‌ڤن ئه‌م باجێ دده‌ینه سه‌ر به‌رهه‌مێن بیانی بۆ ده‌مه‌كێ ده‌ستنیشانكری، دا كو به‌رهه‌مێ مه یێ خومالی بهێته فرۆتن و ده‌مێ به‌رهه‌مێ خومالی د بازاری دا نه‌مینیت ئه‌م باجێ ل سه‌ر وی به‌رهه‌می بیانی رادكه‌ین، چونكو به‌رهه‌مێن مه وه‌رزی نه و دا كو بازار تژی بیت و هه‌موو پێدڤێن خه‌لكی بهێنه دابینكرن.
ناڤهاتی زێده‌تر ژی گۆت: بازارێ هه‌موو جورێن پتاتان ل بازاری دا هه‌یه و پتات ژ وه‌لاتێ ئیرانێ و توركی و گه‌له‌ك جاران ژ هوله‌ندا ژی دهێنه د بازاری دا، چونكو بازرگان ل كیڤه پتات ب ده‌ست كه‌تن و ل كیرێ ئه‌رزانتر بیت و قازانجا وی پتره دێ ژ وێرێ ئینیت و پتات ژ وان خارنێن سه‌ره‌كیه بۆ گه‌له‌ك مال و خارنگه‌هان و نزانم ئه‌گه‌رێن نه‌هاتنا پتاتا توركی چیه د بازاری دا، نوكه بتاتا ئیرانی د بازاری دا یا مشه‌یه و خه‌لكێ مه گه‌له‌ك حه‌ز ژ پتاتا قه‌لاندی دكه‌ن، له‌ورا پتاتا توركی دكرن و ده‌مێ پتاتا مه ده‌ردكه‌ڤیت پتاتا مه گه‌له‌ك یا خوشه و ب كێر كه‌لاندن و قه‌لاندنێ دهێت.
زێده‌تر گۆت: هنده‌ك جورێن پتاتا هه‌نه ب كێر قه‌لاندنێ ناهێت وه‌كو پتاتا ئیرانی بۆ هه‌رچار وه‌رزان وه‌كو ئێك نه‌شێن پتاتان به‌رهه‌م بینین، ئاریشا مه یا سه‌ره‌كی نه‌بوونا ئومبارێن سارن و هه‌كه هه‌بن دێ پتات هێته ئومباركرن و ب ڤی ره‌نگی ل هه‌موو وه‌رزان دێ مه پتات ل به‌رده‌ست هه‌بن، به‌لێ ل ده‌ڤه‌را به‌رده‌ره‌ش و شێخان ب رێژه‌كا باش پتات به‌رهه‌م ئیناینه، جوتیارێن نموونه ب ڤی كاری رادبن و د سالا بوری دا رێژه‌كا باش یا پتاتان هاتنه هاورده‌كرن بۆ وه‌لاتێن عه‌ره‌بی و پتاتا مه سال بۆ سالێ گه‌شه دكه‌ت و مه تاقیگه‌هه‌ك هه‌یه و كه‌سانێن بسپور و شاره‌زا د وارێ چاندنێ دا و ته‌قاویا ل ڤێرێ به‌رهه‌م دئینت و به‌ره ناڤێن كوردی ب دانه سه‌ر وان ته‌قاوی كو وان به‌رهه‌مئیناینه.
خویاژی كر كو پتاتا مه گه‌شه‌كا باش بخوه ڤه دیتیه، ب تایبه‌تی ل ده‌ڤه‌را شێخان و به‌رده‌ره‌ش و سێمێلێ، به‌لێ بۆچی ئه‌م نه‌شێین پتاتێ بۆ هه‌ر چار وه‌رزان ئومباركه‌ین و ئاریشا سه‌ره‌كی زێده‌بوونا ئومبارێن سارن و هه‌كه ئومبارێن سار زێده‌بن ئه‌م دێ شێین بۆ هه‌ر چار وه‌رزان پتاتان به‌رهه‌م ئینین و ده‌مێ پتاتا مه دگه‌هیته به‌رهه‌می و ژ مه زێده‌دكه‌ت ئه‌م فرێدكه‌ینه گه‌له‌ك جهێن دی.
به‌رپرسێ پشكا پلاندانانێ و دووڤچوونێ هێشتا ژی گۆت: نه‌هاتنا بارانان ژ نیڤا هه‌یڤا سێ هه‌تا ده‌مێ دروینا گه‌نمی كارتێكرنه‌كا مه‌زن ل سه‌ر به‌روبومێن كێلگه‌یی كریه و هه‌كه جوداهیێ بكه‌ین ل گه‌ل سالێن بوری وه‌كو تێكرا هندی نیڤا سالێن بوری باران هاتیه و بوویه ئه‌گه‌ر ژێده‌رێن ئاڤێ گه‌له‌ك كێم بووینه. جوتیارێ مه‌ژی ل دووڤ هشكه‌سالیێ به‌رهه‌ڤیێن خوه دكه‌ن و دبیت گه‌له‌ك ئه‌ردێ وان كارتێكرن لێ بیت، چونكو ژێده‌رێ ئاڤێ كێم بوویه.
ل دووماهیێ دبێژیت: هه‌كه ته‌ماشه‌ی هنده‌ك به‌رهه‌مان بكه‌ین وه‌كو باجان و خیار و لوبی و بامی د بازاری دا گه‌له‌ك یا كێمه ژ ئه‌گه‌رێ هشكه‌سالێ یه و جوتیارێ مه ژی هه‌ر ل ده‌ستپێكێ گوهێ وی ل هاتنا بارانا یه دا كو به‌رهه‌ڤێن خوه یێن وێ سالێ بكه‌ت و ئه‌ڤ ساله ژی جوتیاران گه‌له‌ك به‌رهه‌ڤیا خوه كربوو، به‌لێ ژ ئه‌گه‌رێ نه‌هاتنا بارانان گه‌له‌ك جوتیارێ مه خوساره‌ت بوو، به‌لێ جوتیارێ مه هه‌كه بزانن باران دكێمن و دێ به‌رهه‌ڤیا خوه كه‌ن وه‌كو پێدڤی ل دووڤ ژێده‌رێن ئاڤێ هند به‌رهه‌مێ چاندنێ كه‌ن.
