جوداهیهك د ناڤبهرا ریفراندۆما ههرێما كوردستان و كهتالۆنیا دا
نهوزاد هلۆرى
ل دهسپێكێ دڤێت وێ یهكێ بزانین كو ب چو شێوهیان نكارین جوداهیێ د ناڤبهرا ریفراندۆما سهربخوهى یا كوردستانێ و یا كهتالۆنیا دا بكهین، ژبهركو ژینگههێن وان ژ روویێ سیاسى، ئابوورى، جڤاكى …هتد ژێكدوورن، بهلێ ب رهنگهكێ گشتى ب ئهڤان خالێن ل خوارێ ئهم دكارین ههند جوداهیا د ناڤبهرا وان ریفراندۆمان دا بكهین. 1- ئسپانیا وهلاتهكێ گهلهك ب هێز و خودان پێگههه و هزاران ساله هاتیه دروستكرن و د بلندترین پێگههێ دیمۆكراسیێ دایه و خوه ب ئێك ژ باشترین و گرنگترین وهلات دبینیت د دروستكرنا كهشهكێ ئێكسانى و دیمۆكراسى بۆ گهشت تاكێن ئیسپانى، ژ روویێ خزمهتگوزارى و دابینكرنا ئهرك و مافان و خوشگوزهرانیا ژیانێ د بلندترین و باشترین ئاستدایه، بهلێ ههر چهند عیراق ژى ئهڤه نێزیكێ سهد سالایه هاتیه دامهزراندن، بهلێ ههتا نها چو سیمایێن دیمۆكراسیى و پێكڤهژیان و خزمهتگوزارى تێدا دیارنینن و زێدهتر ژ وهلاتهكێ داگیركرى و وێرانكرى دچیت. 2- د سهر ئهڤان ههموو خوشگوزارهنیان دا، خهلكێ ئیسپانیا (كهتالۆنیا بۆ نموونه)، ههست ب ڤالاهیهكا دهروونى دكهت كو ئهو ژى ئازادیه و دخوازیت ژ وى كهش و ههوایى دهركهڤیت و ههناسهكا كوور بكێشیت و بێژیت ئیسپانیا ئێدى نانێ رهزالهتێ و حوكمێ یهكتاپهرستیێ نهما و ژیانهك ئازاد گرنگتره، ب ڤێ رامانێ ههرێما كوردستانێ ژى ل ژێر دهستیا عیراقێ نهرازى یه و دخوازیت ل دۆزهخا سهد سالى یا داگیركاریا عیراقێ دهركهڤیت و ب ئازادى بژیت. 3- ل ئیسپانیا زێدهبارى كو چوو كێشهیێن دارایى و ئابوورى نینن و مووچه و بۆدجه ههیه و ژیانهكا ئاسایى ژ روویێ ماددى ههیه، بهلێ دیسان ژى ریفراندۆم ئهنجام دا، ل ڤێره ب سایا حوكمرانیا رژێمێن ئێك ل دووڤ ئێك یێن عیراقێ ب تنێ وێرانكارى و زولم و ستهم و جینۆساید و كۆمكوژى و برینا نان و قووتێ خهلكى بههرا ههرێمێ بوویه. 4- ههرێما كاتالۆنیا ریفراندۆم ئهنجامدا و ب پرانیا دهنگان، گهلێ كهتالۆنیا بریاردا كو ژ ئیسپانیا دهربچیت و سهربخوهبن، ب ههمان شێوه كوردستانێ ئهڤ یهك كر، ئهڤ یهك مافهكێ قانوونى و یاسایى بوویه ب گۆرهى ههردو دستوورێن ئیسپانى و عیراقێ. 5- كهتالۆنیا و ههرێما كوردستانێ ههردووان ئهنجامێن ریفراندۆمێ سركرن و ههردوان ژى زیانێن زۆر گههاندن خوه ل سهر ئهنجامدانا ریفراندۆمێ. 6- سهرۆكێ ههرێما كهتالۆنیا ژلایێ حوكمهتا ئیسپانیا هاتهگرن و سهرۆكێ ههرێما كوردستانێ ژى ژبهر داوى هاتنا ماوهیێ وى یێ سهرۆكاتیێ ژ پۆستێ سهرۆكاتیا ههرێمێ دوور كهفت، ئانكو ل ڤێره ئهم وان باشتربووین. 7- ریفراندۆم بۆ ههردو ههرێمان دێ مینیت كارتهكا ڤهكرى و ههردهما پێدڤى بۆ و دهمهكى َگونجاى هات دێ هێته بكارئینان. ب گۆرهى خالێن ل سهرى، ههرێما كوردستانێ و ههرێما كهتالۆنیا چو كارێن نهقانوونى نهكرینه، بهلكو ب گۆرهى قانون و دهستوورى داخوازا مافێن خوه یێن ئاسایى كرینه و ب چوو شێوهیان نابیت چوو كهس و لایهن ئهنجامێن ئهرێنى و نهرێنى یێن ریفراندۆمێ بۆ بهرژهوهندیێن خوه بكاربینن. ئهو كهسانێن كو یاریان ب ئهنجامێن (ئهرێنى ـ نهرێنى) یێن ریفراندۆمێ دكهن ژ موزادیهكا سیاسى و بانگهشهكا حزبى بۆ كارهكى َوهكو ههلبژارتنان و راكێشانا دهنگێ نهرازى زێدهتر نینه و رۆژهك دێ هێت ئهو دێ كهڤنه دادگهها گهلى و ب توندرین شێوه دێ هێنه سزادان. ل ڤێره گرنگه حوكمهت و لایهنێن شۆلهژێ ب رێیا دادگههێ كار بكهن بۆ سزادانا ههر كهس و لایهنهكێ كو پیرۆزیێن نهتهوهى و ئاینى و ئهرك و مافێن گهلى وان بنپێ دكهن یان ژى زێدهگاڤیان ل سهر دكهن.
