جوداهی د ناڤبەرا سكالایێن ژن و زەلامان دا ناهێتە كرن
بێوار حەمدی:
ئەو یاسایا وەكو دهیتە جێبەجێكرن ل سەر سكالایێن ژن و زەلامان یاسایا بەرهەنگاربونا توندوتیژیا دژی خێزانێ یە، پارێزەرەكی ژی دیار كر، هەموو كەیسێن توندوتیژیێ ل دادگەهێ بێی جیاوازیا رەگەزی دهێنە توماركرن.
پارێزەر سیامەند یوسف د دیدارەكێ دا بۆ ڕۆژناما ئەڤرۆ دیار كر كو چ یاسا نینن بناڤێ ئێكەتیا زەلامان، بەلێ یاسایەك یا هەی بناڤێ رێكخراوێن نە حكۆمی یا ژمارە 1 كو ل سالا 2011 ل كوردستانێ دەركەفتیە و ئەڤ یاسایە مافی ددەت كو ئێكەتیێن زەلاما و ژنا بهێنە دامەزراندن و گۆت: (ئەڤ یاسایا دهێتە جێبەجێكرن ل سەر سكالایێن ژن و زەلاما ئێك یاسایە ئەو ژی یاسایا بەرهەنگاربوونا توندوتیژیا دژی خێزانێ یە كو ل سالا 2011 ڤێ یاسایێ ڕێكخستن پەیدا كر ل سەر هەموو جورێن توندوتیژیێن خێزانێ چ ژن بیت یان زەلام).
پارێزەری دیار كر ژی، یاسایا بەرهەنگاربونا توندوتیژیێ ژمارە 8 دهێتە جێبەجێكرن ل سەر وان كەیسان یێن كو زەلام ژ مال دهێتە دەرخستن و ماددا 7 ژ وێ یاسایێ سزا دانایە سەر هەر جورە توندوتیژیەكا ب ڤی شێوەی و گۆت: (ئەو سزایە ژی گرتنە كو نە كێمتر ژ شەش هەیڤان و نە زێدەتر ژ 3 سالان، یان ژی غرامە كرن ب ملیونەكێ و نە زێدەتر ژ 5 ملیونا).
پارێزەر سیامەند ئەو چەندە ژی دیار كر كو هەر سكالایەكا بهێتە كرن، ئەڤجا چ توندوتیژی بەرامبەر ژنێ بیت یان ژی زەلامی دهێتە تومار كرن ل دادگەها ڤەكۆلینا توندوتیژیێ و گۆت: (چ جیاوازی دناڤبەرا ژن و زەلامان دا ناهێتە كرن ژلایێ دادگەهێ ڤە و هەموو كەیسێن بڤی جوری ژی ب نهێنی دهێنە ب ڕێڤەبرن).
