جوداکرنا نڤینا ھەڤژینیێ چ کێشە ژێ پەیدا دبن؟
ئه‌ڤرۆ نيوز:
ژنەک ئاشكه‌را دكه‌ت كو گازندە و شەرەدەڤ د ناڤبەرا گەلەک مرۆڤان دا روو ددەت، بتایبەت ھەڤژینان، چۆنکی پتریا دەمێ وان یێ پێکڤەیە و ل گەل ئێکدو دژین ، ھەتا ھەکەدلێ وان ژی ژ ئێک بمینیت جارەک دی ل ئێکدو دزڤرن، بەلێ ھندەک ھەڤژین دبێژن پتریا ژن و زەلامان دەمێ ژ ئێکدو تۆرە دبن یان زەلام زوو نەچیتە مال جھێن وان د جۆدانە و ھەر ئێک ب خوە دنڤیت، شارەزایەکێ جڤاکی ژی دبێژت ئەڤ رەفتارە ژلایەکی ڤە یا نۆرمالە و ژلایەکێ دیڤە ئاریشا دووم درێژ دکەت.
عیسا خۆدان خێزان و زارۆیە و ل دھۆکێ دژیت و گۆت: (ئەڤ رەفتارە ھندەک جاران د خێزانا من ب خوە ژی دا پەیدا بۆیە و نۆرمالە، بەلێ ژلایەکێ ڤە پتر ژنێ دڤێت وەکو تۆلڤە کرن ل گەل زەلامی بکەت ژبەر رەفتارەکا وی یا ب دلێ ژنێ نینە دێ ھەۆل دەت وە بکەت و نڤینا خوە ژ زەلامی جۆدا بکەت، ژبەر ھندێ یە چۆنکی ھزر دکەت ھەر زەلامی پێدڤی یا پێ ھەی، ھەکە ژن ڤێ رەفتارێ نەکەت زەلامی چ جارا نەڤێت خوە ژ نڤینا ھەڤژینا خوە جۆدا بکەت و پتر ژن ڤێ رەفتارێ ئەنجام ددەت، زور جارا ھندەک ھەڤالێن من درەنگی شەڤ دەمێ دچنە ڤە رۆژا پاشتر دبێژن جھێ من ھاڤێت بو ژۆرا دی).
(ە،ء) خۆدانا سێ زارۆیە و دبێژیت: (ھەر دەمێ دلێ من و ھەڤژینێ من ژێک ما ئەم ھەردو خوە ژ ئێک جۆدا دکەین بو ماوێ سێ چار رۆژان و پاشی زەلام دھێت خوە نێزیکی جھێ من دکەت و ئەز ھزر دکەم ھەکە من دانپێدان کر دێ کێماسی بیت، لێ ھەڤژینێ من دبێژیت تو بھیێ یان ئەز جۆداھی نینە و ئەم ئێک خێزانین و پتر ئەوێ دل مەزنە بو من و پتر ئەو نێزیکی منە).
زەینەب عەلی چالاکڤان د بوارێ جڤاکی دا دبێژیت: (ئەڤ رەفتارە ژلایەکی ڤە یا نۆرمالە و ژلایەکێ دیڤە ژی ئەو دلمانیا د ناڤبەرا ھەڤژینان دا دووم درێژ دکەت و دوور نینە جاران ئەو تۆلڤەکرنێ ژی بکەن، چۆنکی دچیتە د خانا کەربوکینێ دا، ژبەرکو خێزان پتر دناڤ جڤاکێ مە دا ل سەر بنەمایێ حەزژێکرن و نڤین و ڤیانا حەزێن ئێک ھاتیە ئاڤا کرن، ئەڤجا دەمێ ئەڤ رەفتارە دھێتە کرن پتر کەربۆکینا دەروونی پەیدا دبیت، چۆنکی ئەڤ بابەتە دبیت نە یێ بەحسکرنێ بیت، لەورا ھەڤژین ڤێ چەندێ ئەنجام ددەن و ئەڤە خالا دووماھیا بێدەنگیێ دیار دکەت).
چالاکڤانا جڤاکی ئەو چەندە ژی بەحس کر کو، ھەکە بەحسا ئالوزیێن ژ ڤێ رەفتارێ پەیدا دبن بکەین دێ بینی ھەڤژین تۆشی دلتەنگیێ دبن ب تایبەت کارێ وان ژ ەرڤەی مالێ ئەوان دامایی و بێ گێول دکەت، چۆنکی خێزان بنگەھێ ئارامیا ھەر ئەندامەکێ خێزانێ یە، ئەڤجا دێ ھەر د ھزران دا بن، ژبەرکو ل دەمێ دگەھنە ئێک پشتا وان یا ل ئێک و دیسا نڤینا وان یا جۆدایە و ژبەر ھندێ پتر زەلام خەموکی دبن و ژن ژی یا تورە و تژی کەرب و کینە و دێ ھەول دەت زارویێن خوە بێشینیت و دەنگێ خوە ل وان بلند بکەت، ئانکو پێ حەساندنا زارۆیا بۆ ڤێ رەفتارا ھەڤژینا دلێ وان نەخۆش دکەت و ھەست ب دامایی بونێ و سلسلوکیێ دکەن و ھەر حەز دکەن د ڤەدەر بن ژ ھەڤالا و گۆت: (دیسا ژی ئەو پەیوەندیا د ناڤبەرا وان و دایک و بابێن وان دا سار دبیت چۆنکی ھەڤژین بتنێ ھزر ل تۆلڤەکرنێ دکەن ژ حەزژێکرن و پێکڤە ژیان و نڤستنا پێکڤە).