جڤاتا نوونه‌رێن ئه‌مریكا داخوازه‌كێ ژ بایدنی دكه‌ت
ب، سه‌رجان مه‌حمود:
كارۆلین مالۆنی ئه‌نداما جڤاتا نوونه‌رێن ئه‌مریكا د داخۆیانیه‌كێ دا راگه‌هاند كو ل گه‌ل هژماره‌ك ئه‌ندامێن جڤاتا نوونه‌ران نامه‌كا تایبه‌ت بۆ سه‌رۆك بایدن و وه‌زیرێ ده‌رڤه شاندینه و د نامێ دا داخواز ژ حوكمه‌تا بایدنی كرینه كو توركیا ل دووڤ بنه‌مایێن هه‌ڤپه‌یمانیا ئه‌تلانتیك (ناتۆ) بزاڤێ ناكه‌ت و بۆ ڤێ چه‌ندێ نابیت ئه‌مریكا فرۆكێن F16 بده‌ته توركیا و گۆت: (ئه‌ردۆغانێ سه‌رۆك كۆمارێ توركیا د ده‌ستپێكا ڤێ هه‌یڤێ دا داخوازا فرۆكێن شه‌ری ژ ئه‌مریكا كریه، لێ وه‌كو دهێته زانین ئه‌ردۆغان چه‌كان ژ رۆسیا دكڕیت و ئه‌و یه‌ك ژی ل دژی بنه‌مایێن ناتۆیێ یه، ژ به‌ر هندێ ژی دڤێت ئه‌مریكا فرۆكێن شه‌ری نه‌ده‌ته توركیا).
كارۆلین مالۆنی هه‌روه‌سا راگه‌هاند ژی كو توركیا ژ رۆسیا موشه‌كان دكڕیت و ل رۆژهه‌لاتا ناڤین ژی مه‌ترسیێ بۆ به‌رژه‌وه‌ندیێن ئه‌مریكا دروست دكه‌ت، نها ژی ئه‌ردۆغانی دخوازا فرۆكێن شه‌ری كرینه، ژ به‌ر هندێ ژی مه داخواز ژ حوكمه‌تێ كریه كو ب چو ره‌نگه‌كێ فرۆكێن شه‌ری نه‌ده‌ته توركیا، چونكو دڤێت به‌ری هه‌ر تشته‌كێ ئه‌ردۆغان خوه ژ رۆسیا دوور بكه‌ت، ده‌ست ژ كڕینا سیسته‌مێ موشه‌كی ژ رۆسیا ژی به‌رده‌ت، هه‌تا توركیا ب فه‌رمی ڤان داخوازیێن ئه‌مریكا بجه نه‌ئینیت نابیت ئه‌مریكا ژی فرۆكێن شه‌ری بده‌ته توركیا، چونكو به‌ری نها ژی توركیا گه‌له‌ك ئالۆزی دروست كرینه.
