جڤاتا نوونەران یان جڤاتا زەنگینان؟
غیاس خالد زێباری
هەمی وەلاتێن جیهانێ ب ناڤێن جودا جڤاتێن تایبەت یێن دارشتنا قانوونا و چاڤدێریا دەستهەلاتێ هەنە، ل وەلاتێن دیموكراسی ئەڤ جڤاتە نوونەرێن خەلكێ خوەنە و ژلایێ خەلكی دهێنە هەلبژارتن، ل هەرێما كوردستانێ و ئیراقێ پەرلەمان و جڤاتا نوونەران هەیە و راستەوخۆ ژلایێ خەلكی دهێنە هەلبژارتن و ب ئەركێن خوە رادبن، لەوما پێدڤی یە ئەندامێن ڤان جڤاتا ب درۆستی نوونەرایەتیا جڤاكی بكەن و دەلیڤا گەهشتن ب ئەندامبوونێ بۆ هەمی وەلاتیان بێ جوداهی هەبیت، راستە ل كوردستانێ و ئیراقێ چ مەرجێن گران و زەحمەت نینە بۆ خوە كاندیدكرنا وەلاتیان، لێ ل ڤان سالێن داویێ ژبەر دیاردەیا پارەدانێ و خەرجێن زێدە یێن بانگەشا هەلبژارتنا لسەر ئاستێ هەرێمێ و ئیراقێ ب رەنگەكێ نە راستەوخوە دەرگەهـێ بەربژێركرنێ لسەر چینا هەژار هاتیە گرتن، گەهشتیە وی ئاستێ كەسێن زەنگین و بازرگان و خوەدی كۆمپانیێن زەبەلاح نەبن شیانێن خوە كاندیدكرنێ نینە، ئەڤەژی بەرفرەهترین چینا جڤاكی كۆ خەلكێ هەژار و قوربانیدەر دبینە قوربانی رەوشا خوە یا دارایی و ل ئەندامەتیا پەرلەمانی یان جڤاتا نوونەران بێ بەهر دبیت . یا ژڤێ چەندێ خراپتر سەرهەلدانا هەڤڕكیێن عەشیرەتی یە د هەلبژارتنێن ڤان جڤاتاندا و لسەر بنەمایێ عەشیرەتگەریێ دەنگ دهێتەدان نەك لسەر بنەمایێ شیان و دلسۆزیا . ژبەر ڤان دیاردا ل هەلبژارتنێن داهاتیدا خەلكێ ئەكادیمی و رەوشەنبیر و هەژار و خودان شیان، ئەگەر ژلایێ پارتیا ویڤە ژی بهێتە دەستنیشانكرن بۆ كاندیدكرنێ، نەوێریت و نەشێت خوە كاندید بكەت، چونكی پڕانیا خەلكێ دەنگدەر فێری پارەوەرگرتنێ و دەستكەفێت تایبەت بووینە، نموونەژی هەنە كەسایەتیێن رەوشەنبیر و ئەكادیمی و دلسۆز ل هەلبژارتنا بەرانبەر كەسایەتیێن جڤاكی و زەنگین و دەولەتەمەند نەشیاینە هەڤڕكیێ بكەن. هەبوونا ڤان دیاردا مینا ڤایرۆسەكێ كۆژەكە دناڤ جڤاكێ مەدا و پێدڤی یە رێك لێ بهێـەگرتن بەری زێدەتر بهێتە تەشەنەكرن، ب تایبەت دیاردا پارەدانێ ژلایێ كاندیدان . باشترین چارەسەریا ڤێ چەندێ ل كوردستانێ گۆهڕینا قانوونا هەلبژارتنا یە ل لیستا ڤەكری بۆ لیستا گرتی و كۆ دەنگدەر تنێ دەنگی ب لیستێ بدەت و حزب ژی كەسانێن ئەكادیمی و رەوشەنبیری و خوەدا نشیان و دلسۆز د ناڤ لیستا خودا دەستنیشان بكەت، داكۆ ئەڤ جڤاتە ب درۆستی ببیتە جڤاتێن نوونەران و جهێ هەمی تەخ و چینا تێدا هەبیت، مەبەست ئەو نینە كۆ كەسێ، زەنگین ودەولەتمەند و جڤاكی ب كێر نەهاتینە، وان ژی وەكی هەر چینەكێ كەسانێن زیرەك و خوەدان شیان هەنە و مافێ وانە بهێنە كاندیدكرن، لێ نابیت مافێ خەلكەكێ دیتر بهێـە خوارن.
