جڤاتا نوو یا باژێڕڤانیا دهۆكێ ده‌ست ب كاربوو
ئه‌ڤرۆ:
ب به‌رهه‌ڤبوونا د. عه‌لی ته‌ته‌ر، پارێزگارێ دهۆكێ دوهی 2/11/2021 رێوره‌سمێن گوهۆڕینا جڤاتا باژێرڤانیا باژێرێ دهۆكێ هاتنه ئه‌نجامدان.
ل به‌راهیێ پارێزگارێ دهۆكێ ل گه‌ل سه‌رۆك و ئه‌ندامێن جڤاتا به‌رێ كۆمبوو، بناڤێ خوه و كارگێریا پارێزگه‌هێ و خه‌لكێ باژێرێ دهۆكێ ده‌ست خوشی و سوپاسیا سه‌رۆك و ئه‌ندامێن جڤاتا به‌رێ یا باژێرڤانیا دهۆكێ كر، ل دۆر ئه‌و خزمه‌تا د 20 سالێن بۆری دا پێشكێش كری و هیڤی خواستن كو حوكمه‌تا هه‌رێما كوردستانێ خزمه‌ت و زه‌حمه‌تا وان ل به‌رچاڤ وه‌ربگریت.
پاشی پارێزگارێ دهۆكێ ل گه‌ل سه‌رۆك و ئه‌ندامێن نوو یێن جڤاتا باژێرڤانیا دهۆكێ كۆمبوو و هیڤیا سه‌ركه‌فتنێ بۆ وان خواست.
پارێزگارێ دهۆكێ ئاماژه ب وێ چه‌ندێ كر كو جڤاتا نوو یا باژێرڤانیا دهۆكێ ژ هه‌ژماره‌كا رێڤه‌به‌رێن گشتی و ژ بسپۆریێن جودا و كه‌سێن شاره‌زا د بیاڤێن جودا جودا دا پێك دهێت و گۆت: “دڤێت هه‌موو كار و ئه‌ركێن جڤاتێ ب هووربینی و دوور ژ رۆتینێ و ل دووڤ یاسا و رێنمایێن گشتی كو د به‌رژه‌وه‌ندیا گشتی دا بن؛ بهێنه ئه‌نجامدان، دیسا پشته‌ڤانیا پارێزگه‌هێ بۆ هه‌ر هاریكاریه‌كێ دیار كر بۆ وێ یه‌كێ خزمه‌تا خه‌لكێ باژێرێ دهۆكێ باشتر بهێته كرن”.
د. عه‌لی ته‌ته‌ر، پارێزگارێ دهۆكێ د كۆنگره‌كێ رۆژنامه‌ڤانی دا دوباره بناڤێ خوه و كارگێریا پارێزگه‌هێ و خه‌لكێ دهۆكێ سوپاسیا سه‌رۆك و ئه‌ندامێن جڤاتا به‌رێ كر ل دۆر ئه‌و خزمه‌تا د سالێن بۆری دا پێشكێش كری، هه‌روه‌سا داخوازا سه‌ركه‌فتنێ بۆ سه‌رۆك و ئه‌ندامێن جڤاتا نوو خواست و پشته‌ڤانیا پارێزگه‌هێ بۆ هه‌ر هاریكاریه‌كێ دیار كر.
هه‌ژی گۆتنێ یه جڤاتا نوو یا باژێرڤانیا دهۆكێ ژ ڤان كه‌سان پێك دهێت: (ملله‌ت سالم محه‌مه‌د عه‌لی، سه‌رۆكێ جڤاتا باژیرڤانیا دهۆكێ، ئیلیاس سادق عه‌بدوللا سادق، جێگرێ سه‌رۆكێ جڤاتێ، چه‌كڤان محه‌مه‌د ئه‌حمه‌دخان ئاڤده‌ل، ئه‌ندام، ئیبراهیم عه‌گید سه‌دیق سه‌عدوللا، ئه‌ندام، ئه‌حمه‌د جه‌میل، ئه‌ندام، كوردۆ ئیحسان عه‌بدولسه‌مه‌د عه‌بدوللا، ئه‌ندام، ڤه‌گێر ئه‌حمه‌د عه‌لی محه‌مه‌د، ئه‌ندام، خه‌یری عه‌لی ئۆسۆ عه‌لی، ئه‌ندام، محه‌مه‌د خالد محه‌مه‌د عه‌لی، ئه‌ندام، شاكر مه‌حموود مه‌حموود سه‌لیم، ئه‌ندام، سه‌عدییه حه‌سه‌ن سه‌یدۆ محه‌مه‌د، ئه‌ندام، ئه‌یاد حه‌سه‌ن عه‌بدولحه‌لیم حه‌سه‌ن، ئه‌ندام، كارۆلین ئادۆر نیخۆ زكا، ئه‌ندام).
دیسا هه‌ر دوهی د. عه‌لی ته‌ته‌ر، پارێزگارێ دهۆكێ دگه‌ل سه‌رۆكێ جڤاتا پارێزگه‌هێ و شانده‌كێ د گه‌ل دا ره‌وشا پرۆژێن خزمه‌تگۆزاری ل پارێزگه‌هێ گه‌نگه‌شه‌كرن.
ب مه‌ره‌ما دانوستاندنێ ل دۆر ئه‌نجامدانا پرۆژێن خزمه‌تگۆزاری و گه‌هاندنا گازنده و تێبینیان دوهی 2/11/2021 شانده‌كێ جڤاتا پارێزگه‌ها دهۆكێ ب سه‌رۆكاتیا “فه‌هیم عه‌بدولا حه‌مو” سه‌رۆكێ جڤاتا پارێزگه‌ها دهۆكێ سه‌ره‌دانا “د. عه‌لی ته‌ته‌ر” پارێزگارێ دهۆكێ كر.
د هه‌ڤدیتنه‌كێ دا هه‌ردولا باس ل هه‌ماهه‌نگیا زێده‌تر بۆ دووڤچوونا پرۆژێن خزمه‌تگۆزاری و گازنده و تێبینی و پێشنیارێن وه‌لاتیان كر ل دووڤ رێكارێن یاسایی و ب هه‌ماهه‌نگی بۆ پێدانا زانیاریان بۆ ئه‌ندامێن جڤاتێ و دووڤچوونا بابه‌تان، پارێزگارێ دهۆكێ خۆشحالیا خوه ب ڤێ سه‌ره‌دانێ ده‌ربڕی و به‌رهه‌ڤیا كارگێریا پارێزگه‌هێ بۆ هه‌ر هه‌ماهه‌نگی و هه‌ڤكاریه‌كێ دیار كر.
دیسا هه‌ر دوهی د. عه‌لی ته‌ته‌ر، پارێزگارێ دهۆكێ پێشوازی ل د. توماس شیلد، رێڤه‌به‌رێ ئوفیسا پارێزگه‌ها دهۆكێ یێ رێكخراوا نێڤده‌وله‌تی یا GIZ كر و د هه‌ڤدیتنه‌كێ دا پارێزگارێ دهۆكێ سۆپاسیا رۆلێ كاریگه‌رێ رێكخراوا ناڤبری ل پارێزگه‌ها دهۆكێ و هه‌رێما كوردستانێ كر و په‌یوه‌ندیێن دگه‌ل كۆمارا فیدرالی یا ئه‌لمانیا بلند هه‌لسه‌نگاندن و هیڤیا پیشڤه‌چوونێ بۆ خواست، دیسا ره‌وشا پرۆژێن خزمه‌تگۆزاری و ئاواره و په‌نابه‌ران و چاوانیا پێشڤه‌برنا په‌یوه‌ندیان كر، هه‌روه‌سا داخوازا سه‌ركه‌فتنێ بۆ دكتۆر توماس شیلد د كارێ وی یێ نوو دا كر.
دكتۆر توماس شیلد سۆپاسیا پارێزگارێ دهۆكێ و خه‌لكێ پارێزگه‌ها دهۆكێ كر و دا دیاركرن كو كاركرنا وان ل پارێزگه‌هێ ستراتیژی یه و گۆت: “هیڤیدارین ئه‌ڤ هه‌ماهه‌نگی و هه‌ڤكاریه یا به‌رده‌وام بیت و مه شیابیت خزمه‌تا هه‌وه بكه‌ین”.
