جڤاتا پارێزگه‌ها دهۆكێ ب به‌رهه‌ڤبوونا جێگرێ پارێزگاری و سێ رێڤه‌به‌ران دێ كۆم بیت
ئه‌ڤرۆ، نیوار محه‌مه‌دسه‌لیم:
بڕیاره ئه‌ڤرۆ رۆژا چارشه‌مبی رێكه‌فتی 24ی چریا دویێ 2021، جڤاتا پارێزگه‌ها دهۆكێ كۆمبوونا خوه یا ئاسایی یا هه‌ژماره 122 بگێڕیت، كو یا تایبه‌ته ب ره‌وشا سه‌ربڕخانا دهۆكێ ڤه.
د ڤی ده‌رباره‌ی دا، ئه‌حمه‌د ئه‌مین ئوزمانی، ئه‌ندامێ جڤاتا پارێزگه‌ها دهۆكێ، د داخویانیه‌كێ دا بۆ رۆژناما ئه‌ڤرۆ گۆت: “بڕیاره ئه‌ڤرۆ جڤاتا پارێزگه‌ها دهۆكێ ل دۆر ره‌وشا سه‌ربڕخانا دهۆكێ كۆم ببیت و بۆ ڤێ مه‌ره‌مێ ژی هه‌ر ئێك ژ جێگرێ پارێزگارێ دهۆكێ بۆ كاروبارێن كارگێری و رێڤه‌به‌رێ ڤێتێرنه‌ریا دهۆكێ و رێڤه‌به‌رێ چاڤدێریا ساخله‌میێ و رێڤه‌به‌رێ ژینگه‌ها دهۆكێ هاتینه مێهڤانكرن”.
زێده‌تر گۆت: “ئه‌ڤه كۆمبوونا دویێ یه، جڤاتا پارێزگه‌ها دهۆكێ ل دۆر ره‌وشا سه‌ربڕخانا دهۆكێ ئه‌نجام دده‌ت، مه‌ره‌م پێ چاره‌كرنا وان ئاریشایه یێ د ناڤ سه‌ربڕخانێ دا هه‌ین”.
ئه‌حمه‌د ئه‌مین ئوزمانی ئاشكه‌را ژی كر كو پتریا به‌ندێن رێككه‌فتنا د ناڤبه‌را كۆمپانیێ و پارێزگه‌هێ دا نه‌هاتینه بجهئینان و گۆت: “ره‌وشا سه‌ربڕخانا دهۆكێ گه‌له‌ك یا خرابه و دڤێت بهێته نووژه‌نكرن به‌ری دووباره بده‌نه‌ف كۆمپانیان”.
ل ده‌ستپێكا دروستكرنا سه‌ربڕخانا دهۆكێ، د ده‌ستێ حوكمه‌تێ دابوو و پاشی ژی بۆ كه‌رتێ تایبه‌ت هاتیه ڤه‌گوهاستن و ژ كه‌رتێ تایبه‌ت ژی بۆ پتر ژ كۆمپانیه‌كێ كه‌فتیه ب رێیا سه‌ركزێده‌كرنان، ب گۆره‌یی لژنه‌كا تایبه‌ت یا جڤاتا پارێزگه‌ها دهۆكێ كو ب مه‌ره‌ما دووڤچوونا ره‌وشا وێ هاتیه پێكئینان، ره‌وشا سه‌ربڕخانێ گه‌له‌ك یا خرابه و پێدڤی ب نووژه‌نكرنێ یه.
ئه‌ندامێ جڤاتا پارێزگه‌ها دهۆكێ ئه‌و چه‌نده ژی نه‌ڤه‌شارت كو ب ره‌نگه‌كێ گشتی دووڤچوونا سه‌ربڕخانێ ژ لایێ لایه‌نێن په‌یوه‌ندیدار ڤه نه‌هاتیه كرن و ئه‌ڤه بوویه ئه‌گه‌ر كو كۆمپانی ب دروستی رێنمایان ب جه نه‌ئینن.
