جڤاتا گوندێ گوهەرزێ: هەركەس و لایەنەكێ مە تۆمەتبار بكەت دێ سكالایێ ل سـەر تۆمار كەین
ئامێدیێ، مەحمود نهێلی:
هەلبژێر و جڤاتا گوندێ گوهەرز ل سنوورێ ناوچەدارییا دێرەلۆكێ رۆهنكرنەك ل سەر شەڕێ ڤێ داویێ یێ د ناڤ گوندێ وان دا روودای؛ بەلاڤكر و داخواز ژ پەكەكێ و لەشكرێ توركیا كریە رەوشا تەناهی و بارێ دەروونی یێ خەلكێ گوندی ل بەرچاڤ وەربگرن و شەڕێ خوە ل جهێن ئاكنجی بوونێ دوور بكەن و تێدا هاتیە: هەر كەس و لایەنەكێ د تۆڕێن جڤاكی دا تۆمەتێن بێ بنەما بۆ گوندیێن مە دروست بكەت دێ سكالایێ ل سەر تۆمار كەین.
د رۆهنكرنا وان دا هاتیە: «د نوكە دا دەڤەرێن مە ب گشتی و ب تایبەتی گوندێ گوهەرز، یێن بووینە گوڕەپانێن شەڕەكێ دژوار د ناڤبەرا سوپایێ توركیا و پەكەكێ دا، ترس و دودلی و نەئارامی ل نك زارۆك و خەلكێ سڤیلێ گوندی یێن چێبووین، دیسا زیانێن مەزن گەهشتینە مە».
دیسا د رۆهنكرنا وان دا هاتیە: «ل ئێڤاریا 21ی شواتا 2025ێ، خەلكێ گوندی ب پیر و لاو و ژن و زارۆكان ڤە بینەرێن دیمەنێن ب ژان و دلئێشێن شەڕێ وێ ئێڤاریێ بوون، ئەڤێ روودانێ دلتەنگی و خەمێن مە زێدە و دژوارتر لێ كرن، ئەم وەك خەلكێ گوندێ گوهەرزێ داخوازێ ژ هەردو هێزێن پەكەكێ و توركیایێ دكەین ڕەوشا ئێمناهیێ و لایەنێ دەروونیێ خەلكێ گوندی ل بەرچاڤ وەربگرن و شەڕی ژ ئاڤەدانی و خەلكێ سڤیل دوور بێخن، هەروەسا رایا گشتی ژی ئاگەهدار دكەین، ب چ ئاوایەكی مایتێكرنێ د ڤی شەڕی دا ناكەین و ئارامی و سەقامگیری و ئاسایشا خەلكێ گوندێ خوە ب چ بهایەكی ناگوهۆڕین، هەروەسا هەر كەسەكێ ل دەزگەهەكێ ڕاگەهاندنێ یان ل سەر تۆڕێن جڤاكی تۆمەتەكا بێ بنەما ئاراستەی خەلكێ مە بكەت، دێ سكالایا یاسایی ل سەر تۆمار كەین».
د دووماهیا رۆهنكرنا جڤاتا گوندێ گوهەرز دا هاتیە: «ئازار و ژانێن ڤی شەڕی لسەر مە گەلەك دگرانن، هیڤیدارین چو كەس و لایەن بێ بنەما و دوور ژ ئەتەكێت و ڕەوشتێن مرۆڤی، پتر دەربازكرنا ژیانێ ل سەر مە گران نەكەن و ڕەوشا هەستیار و پڕ مەترسییا ل سەر خەلكێ مە هەی، ل بەرچاڤ وەربگرن، هیڤیا مە ژیانەكا ئارام و ب كەرامەت و دوور ژ شەڕ و ئالوزیێن ئەولەهییە و ئاشتی و ئارامی داخوازی و هیڤیێن مەنە».
