جڤاتەكا بلند ژ بۆ كاروبارێن ئێزدیان دێ هێتە دانان
ئەڤرۆ، دلڤین رەشید:
شیرەتكارێ جڤاتا رۆحانیا ئێزدیان بۆ رۆژناما ئەڤرۆ دیار كر، بزاڤێن خورت دهێنە كرن ژ بۆ دانانا جڤاتەكا بلند ژ بۆ كاروبارێن ئێزدیان، ئەڤ جڤاتە ژ جڤاتا رۆحانیا ئێزدیان و سەرۆك عەشیر و رەوشەنبیران دێ پێك هێت و دبێژیت: هزرا دانانا ڤێ جڤاتێ ڤەدگەڕیتە بەری 26 سالان و دێ یا تایبەت بیت ب كاروبارێن ئێزدیان ڤە.
كەریم سلێمان، شیرەتكارێ جڤاتا رۆحانیا ئێزدیان گۆت: «ئەڤ جڤاتە ل سەر هندەك بنەمایان دێ هێتە دانان، ل دەستپێكێ لژنەكا بەرهەڤكار دێ هیتە دانان و پەیرەو و پرۆگرامەكێ باش بۆ وێ جڤاتێ دێ هێتە دانان، د ناڤا ڤی پەیرەوی دا دێ دیاربیت، كا ئەم دێ چ خزمەت پێشكێشی جفاكێ ئێزدی كەین، چونكی ئارمانجا مە یا سەرەكی ئەوە، ئەم خوە ل لایەنێ ئولی و جڤاكی یێ ئێزدیان بكەینە خودان، ب تایبەتی دەمێ د رەوشەكا خراب و نالەبار دابن، داكو جهەك هەبیت خوە ل وان بكەتە خودان و بەرەڤانی ژ مافێن وان بكەت».
ل دووماهیێ گۆت: «ئەم یێ بزاڤان دكەین، ئەڤ جفاتە ب زووترین دەم بهێتە دانان، ژ بەركو د قووناغا ئەڤرۆ دا ئێزیان پێدڤیەكا مەزن ب ڤێ جڤاتێ هەیە».
