جڤـاك ب سـوشیال میدیـایێ ئالـۆدە بوویـە
زنار تۆڤی:
د نوكە دا تێلەفۆنێ و ئینتەرنێتێ و سۆشیال میدیایێ، كاریگەریەكا مەزن ل سەر پەیوەندیێن جڤاكی و هەڤالینیێ كریە و بووینە پشكەك ژ سیستەمێ پێكهاتەیا ژیانا هەر كەسەكی ل جیهانێ، شارەزایەكێ جڤاكی ژی گۆت: دڤێت ئەم بزانین چاوا دێ مفای ژ تەكتولوجیا سەردەم وەرگرین و نەبینە پشكەك ژ كارێكتەرێن سۆشیال میدیایێ.
شارەزایێ جڤاكی یوسف ئۆسمان، بۆ رۆژناما ئەڤرۆ دیار كر كو ژلایێ دەروونی و جڤاكی و هزری و خێزانی ڤە، سۆشیال میدیا بۆیە پشكەك ژ ژیانا مە هەموویان، هەروەسا بوویە پشكەك ژ سیستەمێ پێكهاتەیا خێزانێ و جڤاكی و ژیانا هەر تاكەكێ د ڤێ جیهانێ دا و گۆت: نوكە سیستەمێ جڤاكی هەموو ب رێیا ئینتەرنێتێ و سۆشیال میدیایێ یە.
یوسف ئۆسمان، ئەو چەندە ژی دیار كر كو هەكە مرۆڤ سۆشیال میدیایێ خراب بكاربینیت، دێ دەمێ مرۆڤی هەموویێ بەت و ڤیانێ، هەڤالینیێ و دلۆڤانیێ ناهێلیت دناڤبەرا تاكێن جڤاكی دا و گۆت: سۆشیال میدیایێ كەرب و كین د جڤاكی دا پەیدا كریە، بۆیە ئەگەر كو ئەم ل گەل ئێكودوو نە روینینە خوار و پێكڤە نەچینە سەیرانان و ل گەل ئێكودوو سوحبەتا نەكەین و پێكەنینان نەبێژین، نوكە هەموو تشتێ مە بوویە سۆشیال میدیا، د هەمان دەمدا سۆشیال میدیایێ وەكریە كو ئێدی ئەم حەز ژ خواندنا پەرتوكان نەكەین.
شارەزایێ جڤاكی د بەردەوامیا ئاخفتنێن خۆدا گۆت: لەوما ژلایێ دەروونیڤە ئەم تووشی نەخۆشیەكێ بووینە، ئەو ژی نەخۆشیا سەردەمی یە كو نەخۆشیا ئالودەبوونێ یە ب ئامیرێن ئەلكترۆنی، یان ژی ئالودەبوونە ب سۆشیال میدیایێ ڤە، ڤێ نەخۆشیێ هەموو تاكێن جڤاكی ڤەگرتینە، ئەم یێن بۆینە پشكەك ژ سۆشیال میدیایێ و دەمێ مە داگیر كریە، نوكە ئەو ئاراستەیا مرۆڤان دكەت.
یوسف ئۆسمان گۆتژی: ئەڤجا دڤێت مە ئاگەه ژ خۆ هەبیت و بارێ خۆ یێ دەروونی رێك بێخین و وان پەیوەندیێن خۆ یێن جڤاكی و ئەو حەزژێكرن و دلۆڤانیا بەری نوكە یا دناڤ خێزانێ دا هەیی ڤەگەرینینەڤە، چونكی د نوكە دا و د سەردەمێ سۆشیال میدیایێ دا، ئەڤ چەندە هەموو یا ژناڤ چوویی.
شارەزایێ جڤاكی یوسف دیار كر كو هەرچەندە سۆشیال میدیایێ كارێ مرۆڤان ب ساناهیتر لێ كریە و گۆت: بەلێ ئەم نزانین بكاربینین، ئەم ب خرابی بكاردئینین، لەوما ئەم تووشی ئاریشان دبین و تووشی نەخۆشیێن دەروونی دبین، خێزان ژناڤ چوویە، لەوما یا گرنگە، ئەم زارۆیێن خۆ پەروەردە بكەین و بزانین چاوا مفایی ژێ وەربگرین و نەبینە پشكەك ژ كارێكتەرێن سۆشیال میدیایێ.
