جۆتیارەكێ زاخۆ ئەڤ سالە ٣ هزار تەنێن پتاتان بەرهەم ئیناینە
زاخۆ، دلۆڤان هالۆ:
جۆتیارەكێ ئیدارا سەربخوە یا زاخۆ ل سەر ڕووبەرێ 400 دۆنەمێن ئەردی ل گۆندێ دورنەخێ پتات چاندبوون، د ئەڤ سالە دا زێدەتری 3 هزار تەنێن پتاتان ژێ هاتینە بەرهەمئینان و هاتینە ڕەوانەكرن بۆ بازاڕێن هەرێما كوردستانێ و ئیراقێ.
سەعدوللا شنگالی، خودانێ زەڤیەكا مەزن یا بەرهەمێ پتاتان ل زاخۆ بۆ ڕۆژناما ئەڤرۆ دیار كر، ئیدارا سەربخوە یا زاخۆ ئاخەكا ب پیت و ڕووبارێ خابیری هەیە، لەورا ئەڤ چەندە هاریكارە بۆ چاندنا پتاتان، ئەڤە بۆ ماوێ ٦ سالانە ل سەر ڕووبەرێ 400 دۆنەمێن ئەردی ئەز پتاتان دچینم و سالانە 3 هزار تەنێن پتاتان بەرهەم دئینم و بۆ پارێزگەهێن هەرێما كوردستانێ و عێراقێ دهنێرین ب تایبەت بۆ بەغدا و نەجەف زێدەباری فرۆتنا پتاتان ل بازاڕێن زاخۆ و دهۆكێ.
ناڤهاتی ئاماژە ب وێ چەندێ ژی كر، ل هەیڤا 2 ئەم پتاتان دچینین و ل دووماهیا هەیڤا ٦ پتاتان بەرهەم دئینین، ڕۆژانە دناڤبەرا ١٠٠ هەتا ١٥٠ تەنێن پتاتان ژ زەڤییێن مە دهێنە بەرهەمئینان و ڕۆژانە دناڤبەرا ٦٠ هەتا ١٥٠ كرێكاران د زەڤیێن مە یێن پتاتان دا كار دكەن، و گۆژمەكێ مەزن یێ پارەی ل چاندن و بەرهەمئینانا پتاتان دهێتە مەزاختن ب تایبەت بۆ كیمیا و گاز و دەرمان و كرییا كرێكاران.
گۆت ژی: «حكومەتا هەرێما كوردستانێ گەلەك كارئاسانی بۆ مە جۆتیاران كرینە، ب تایبەت ئەڤ سالە مە ئاریشەیا هنارتنا بەرهەمێ پتاتان ل زالگەها بەغدا هەبوو، لێ ب هاریكارییا ڕێڤەبەرییا چاندن و ژێدەرێن ئاڤێ ل زاخۆ ئەو ئاریشە هاتە چارەسەركرن و ڕۆژێن ئەیینی و شەمبیان ژی ل زالگەها بەغدا ڕێك ب مە دهێتە دان بۆ هنارتنا بەرهەمێ پتاتان».
