جیلان جارۆ: ب هیڤی مە و ئارمانجا منە د قارمانییێن نێڤدەولەتی دا پشکداربم
عائیشە عەجیب
د دیدارەکێ دا جیلان جاڕۆ کچەکا ئێزدی یا دەڤەرا شێخان بەحس ل وێ چەندێ دکەت کو بۆ ئێکەم جار کەنگی دەست ب وەرزشێ کر و چاوا بۆ ئێکەم جار د قارەمانییێ دا شیا سەرکەفتنێ بدەستڤە بینیت و گۆت: گەلەک یا دلخۆشم کو من شیا ڕێزا ئێکێ د قارەمانییا ھێپ پرێس دا ل سەر ئاستێ ئێراقێ بدەستخۆڤە بینم، ژ یاریێن پارسەنگی بۆ کێشا ٦٧ کگم و شیا ٢٠٠ کگم بلندەکەم.
زێدەتر ناڤھاتی بۆ رۆژنامەیا ئەڤرۆ گۆت: دەستڤەئێنانا ڤی ناسناڤی ھەستەکێ گەلەک خۆش ل دەف من پەیداکر، کارتێکرنەکا مەزن لمن کریە کو بشێم ئەو زەحمەت و ماندیبوونا خۆ بدەمە لایەکێ، گاڤێن باشتر ژ بۆ قارەمانییێن نێڤدەولەتی دا بھاڤێژم، ئەڤە چار سالە من دهست ب ڤێ وهرزشێ کری و ل ڤێ دووماهیێ من ڤیا گاڤێن باشتر د ڤێ قارهمانییێ دا بھاڤێژم دا بشێم پشکدارییێ د قارهمانییا ھێپ پرێس دا بکهم، دهستپێکێ گرنگترین تشت د قارەمانییێ دا بۆ من پشکداری بوو، چونکی من باوەریەکا بهێز ب شیانێن خوە ھەبوو، سەڕەرای هەڤرکیێن من ژی گەلەک بھێز بوون، لێ د وی دهمی دا ئارمانجێن من ل پێش چاڤێ من بوون، ھەروەسا دەمێ ڕاھێنان یێ کێم ژی بۆ، لێ من دهست نە داھێلان و بهردهوام بیم، سۆپاس بۆ خودێ ھەتا من شییا ڕێزا ئێکێ د قارەمانییا بلندکرنا ئاسنی دا بینم و ل سەر ئاستێ ئێراقێ سەرکەفتنێ بینم و ب هیڤی مە و ئارمانجامن پشکداری د قارەمانیێن نێڤدەولەتی دا بکەم.
ژ لایەکێ دویڤە جیلان جاڕۆ ئاشکرا ژی کر: ب ژ لایێ کاپتن حجی ڤە بۆ ڤێ قارەمانییێ ھاتمە ئاگەھدارکرن، ھەر چەندە دەمێ ئاگەھدارکرنێ بۆ قارەمانییێ یا کێم ژی بۆ و ئامادەکاری ڤێ یارییێ ئاسان ژی نەبوون، لێ ب ڕاھێنەرییا کاپتن عەلی حەسەن بەردەوام ل گەل من بۆ ھەر ژ دەستپێکا ڕاھێنانان ھەتا دووماھیێ و ھەروەسا خێزانا من ژی گەلەک ل گەل من د ھاریکار بوون، د ژییەکێ بچوویکدا حهزا وهرزشێ من ھەبوو و بتایبهتی یاریا ئاسنی ڕۆژ بۆ ڕۆژێ حهزا وێ لدهفمن زێدەتر لێھات و ھەتا گەھشتیمە ژیەکێ گونجای و من دەست ب ڤێ یاریێ کر، چونکی وهرزش گرنگییەکا زێدە ههیه بۆ ساخلهمیا مرۆڤی و ئەڤ یاریە تایبەتمەندییەکا بھێز ھەیە و وەدکەت کو شیانێن کارێن ڕۆژانە یێن لەشی بھێز بکەت، و جوانییەکا ڕێکۆپێک ددەتێ لەشی مرۆڤان، پێشتر بابێ من پشکداری د ڤان جۆرە یاریان دا کر بوو، لەوڕا ئەو ژی بۆ من بۆ پالدەرەک حەزا من بۆ ڤێ یاریا وەرزشێ زێدەتر لێھات.
وەرزشڤانا کچ گۆت ژی: ئهز وهک کچهکا ئێزدی سەر بلندم من شیای ڤی ناسناڤی بدهست ڤە بینم، ھیڤیدارم من شیابیت تا ڕادەیەکێ باش شیانێت خوە وهک کچهکا ئێزدی بۆ جڤاکی بدهمه دیارکرن، زێدهباری وێ چهندێ ھیڤیا من ئهوه جڤاکێ مه پتر ل گەل ئافرەتان هاریکاربیت کو ئافرەتا خودان بەھرە پێبگەھینیت.
وەرزشڤان جیلان دیار ژی کر: ھەتا نوکە من بخۆ پشتاڤانییا خۆ یا کری، بەلێ ئەڤ جۆرێ وەرزشی پێدڤی ب پشتەڤانی و گرنگییەکا مەزن ھەیە پێ بھێتە دان، داخوازێ ژ جھێن شولە ژێ دکەم پشتەڤانییا من بکەن و ھاریکاربن ل گەل من، دا کو پتر بشێم ناسناڤا بدەست ڤە بینم و خزمەتا وەرزش و خانمێن وەرزشکار بکەم.
