جیهانا شرین
ڕۆژا مزووری
تو دژی د ڤێ ژینێ دا؟
یان ل ژیانێ دگەڕی؟
یا تە دڤێت هاتییە دیتن؟
یان تو ل دۆر خۆ دزڤڕی؟
تو مری و بن ئاخ نەبووی؟
یان ژی هێشتا تو نەبووی؟
د خۆشییێ دا خەمگینی و
نزانی خۆشی توی؟
وەرە دا پێکڤە بژین
ل وارێ خۆشییێ بمینین
وەكی ژیانێ گەش بین
ئەڤینێ د دل دا بحەوینین
خۆزییا پێکڤە بنڤینین
خەونێن خۆ بجهـ بینین
وەك دو کۆتران بفڕین
ل کوردستانێ بگەڕین
ئێدی بۆ ئێك نەگرین
بەژنا خۆ بخەملینین
ئەز و تو ئێك نیگارین
ڕەنگێن خۆ دێ پارێزین
مە دگەل ئێك دا دیت ژین
دو دل بۆ ئێك دهەژین
ل ڤێ جیهانا شرین
هەر دێ بۆ ئێكودو ڤەژین
