جێمز جێفری: تورکیا ئارمانجەکا جودا ل باکورێ سووریێ یا هەی
نوونەرێ بەرێ یێ ئەمریکا بۆ کاروبارێن سووریێ راگەهاند، ئۆپەراسیۆنێن ئەسمانی یێن تورکیا ل دژی هێزێن سووریا دیموکرات ل باکورێ سووریێ دێ بەردەوام بن، تورکیا جارێ تنێ ژ ئەسمانی ئێرش دکەت، لێ تورکیا خوە بۆ ئۆپەراسیۆنەکا بەرفرەه یا ئەردی ژی بەرهەڤ دکەت، چونکی تورکیا نەڤێت پەکەکە و هێزێن سەر ب وێ ل باکورێ سووریێ خوە بهێز بکەن، ژ بەر هندێ ژی تورکیا پێنگاڤ ب پێنگاڤ دڤێت هێزێن سووریا دیموکرات و یەپەگێ لاواز بکەت یان ژی وان ژناڤ ببەت، راستە هەتا نها ئەمریکا ئاستەنگیان دروست دکەت لێ تورکیا ژی دڤێت دەلیڤێن هەی ژ دەست نەدەت و ئێرشێن خوە بەرفرەهتر لێ دکەت.
ل گۆر باوەریا جێمز جێفری ئەمریکا و تورکیا گەلەک بەرژەوەندیێن هەڤپشک ل رۆژهەلاتا ناڤین و هەتا ل سووریێ ژی هەنە، ژ بەر هندێ ژی هەتا نها ئەمریکا چو هەلوەستەک وەسا توند ل دژی تورکیا نیشا نەدایە، بەلکو هەلوەستێ نها یێ ئیدارا ئەمریکا ل هەمبەر ئێرشێن ڤێ دووماهیێ یێن تورکیا ل سەر باکورێ سووریێ گەلەک نەرمە.
