جێگرێ سەرۆكێ جڤاتا نوونەرێن ئیراقێ بۆ (ئەڤرۆ): كێشەیا نەهنارتنا مووچەی سیاسی یە و پەیوەندی ب بەهانەیێن تەكنیكی ڤە نینە
دیدار/ دلۆڤان ئاكرەیی
جێگرێ سەرۆكێ جڤاتا نوونەرێن ئیراقێ ، ل دۆر هێرشێن درۆنی ل سەر زەڤییێن پەترۆلی یێن هەرێما كوردستانێ ئاشكراكر كو ناڤێن وان كەس و ئالیێن بەرپرس ژ هێرشێن درۆنی ل سەر هەرێما كوردستانێ ل بەردەستێ وانن و داخواز ژ حوكمەتا ئیراقێ كر لێپرسینێ ل گەل وان ئالی و گرۆپان بكەت و سزا بدەت.
شاخەوان عەبدوللا، جێگرێ سەرۆكێ جڤاتا نوونەرێن ئیراقێ بۆ رۆژنامەیا (ئەڤرۆ) گوت» حوكمەتا ئیراقێ ئاگەهداری ناسنامەیا هێرشكارانە و پێدڤییە پێرابوونێن قانوونی ل بەرامبەر وان وەربگریت، نەك سزایێ خەلكێ كوردستانێ بدەت».
شاخەوانی دیاركر ژی» د دەمێ چار رۆژاندا، دناڤبەرا 14 – 18ێ ڤێ مەهێدا، 14 درۆن ئاراستەی هەرێما كوردستانێ هاتینە كرن».
سەبارەت پرسا پەترۆلێ و رادەستكرنا وێ ب بەغدایێ، جێگرێ سەرۆكێ جڤاتا نوونەرێن ئیراقێ رۆهنكر»هەرێما كوردستانێ یا بەرهەڤە ل دووڤ بەرهەمێ نوكە یێ زەڤیێن پەترۆلێ ل هەرێمێ، پەترۆلێ رادەستی كۆمپانییا (سۆمۆ)ی بكەت و ل گەل زێدەبوونا بەرهەمی، رێژەیا رادەستكرنێ ژی دێ زێدە بیت».
ناڤبری ئاماژە ب وێ یەكێ ژی كر كو حوكمەتا هەرێما كوردستانێ ب فەرمی ئەڤ بەرهەڤییا خوە ب حوكمەتا ئیراقێ راگەهاندیە. هەروەسا دیاركر ژی كو ل گەل بالیۆزخانەیا ئەمریكا كۆمبووینە كو ئەو ژی پشتەڤانیێ ل چارەسەركرنا كێشەیا مووچەی و دەستپێكرنا هنارتنا پەترۆلا هەرێمێ دكەن.
ل دۆر مووچەیێ مەها شەش یێ فەرمانبەرێن هەرێمێ، شاخەوان عەبدوللای گوت»پێرابوون ژ ئالیێ مە ڤە تمام بووینە و ئەوا مای ل دەف حوكمەتا ئیراقێیە ، كو كێشەیا نەهنارتنا مووچەی سیاسییە و پەیوەندی ب بەهانەیێن تەكنیكی ڤە نینە، وەك هنارتنا مووچەیێ مەها پێنج بێ بڕیارا دادگەها فیدرالی كو بەری نها وەك بەهانە دهاتە گوتن، هاتە هنارتن».
ئاماژە ب وێ چەندێ ژی كر» د بودجەیا سالا 2026 ێ دا، گوهۆڕین د پشكا هەرێما كوردستانێدا دێ هێنە كرن و پێدڤییە مووچەیێ مەها شەش بهێتە مەزاختن، ب تایبەت كو لژنەیێن پەیوەندیدار كارێن خوەتمام كرینە و حوكمەتا هەرێمێ ژی بەرهەڤییا خوە بۆ رادەستكرنا پەترۆلێ نیشادایە».
دەربارەی پڕۆژەقانوونا شەهیدان و زیندانیێن سیاسی ل جڤاتا نوونەرێن ئیراقێ، شاخەوان عەبدوللای هەلوەستێ خوە راگەهاند و گوت» رێكێ نادەین ئەڤ پڕۆژەقانوونە دەرباز بیت، هەتا كەسوكارێن ئەنفالكرییان و شەهیدێن هەلەبجە وەك پشكەكا سەرەكی د پڕۆژەیدا نەهێنە جهگیركرن».
