جێگرێ پارێزگه‌رێ نه‌ینه‌وا: پێدڤیه‌ پشكا مه‌زن ژ بودجا نه‌ینه‌وا بۆ ده‌ڤه‌رێن كوردستانی بیت

جێگرێ پارێزگه‌رێ نه‌ینه‌وا، رفعه‌ت سمۆ راگه‌هاند، ده‌ڤه‌رێن كوردستانی دهێنه‌ ئاڤه‌دانكرن، به‌لێ وه‌كو پێدڤی نینه‌ و پێدڤیه‌ ژ بودجا بۆ نه‌ینه‌وا دهێته‌ ته‌رخانكرن، پشكا شێری بۆ ده‌ڤه‌رێن كوردستانی بیت، چونكه‌ زیانێن زێده‌تر به‌ر ب وان ده‌ڤه‌ران كه‌فتینه‌.

رفعه‌ت سمۆ گۆت ژی، حوكمه‌تا ئیراقێ زێده‌تر ژ 300 ملیار دیناران بۆ نه‌ینه‌وا ته‌رخان كرینه‌ بۆ ئه‌نجامدانا پرۆژێن خزمه‌تگوزاری و ژ وێ بودجێ مه‌ پشكا ده‌ڤه‌رێن كوردستانی ژی دانایه‌ و تنێ بۆ شنگالێ 28 ملیار دینارن و بۆ مه‌خموورێ و ده‌شتا نه‌ینه‌وا ژی بودجه‌ هاتیه‌ ته‌رخانكرن، به‌لێ ل ده‌مێ بۆری گرفت بۆ خه‌جكرنا پاره‌ی دروستبوو و پاشی شانده‌كێ پارێزگه‌ها نه‌ینه‌وا سه‌ره‌دانا به‌غدا كر و ل گه‌ل حوكمه‌تێ ئه‌و گرفته‌ چاره‌سه‌ركر و بریاره‌ ده‌ست ب خه‌جكرنا پاره‌ی بهێته‌ كرن و ئه‌و پرۆژێن دێ هێنه‌ بجهئینان زێده‌تر د خزمه‌تگوزاری نه‌ وه‌كو رێ و پر و دروستكرنا قوتابخانه‌ و نه‌خوه‌شخانه‌ و پرۆژێن ئاڤ و كاره‌بێ و پرۆژێن دی نه‌.

کۆمێنتا تە