جەماوەرێ دەڤەرا ئامێدیێ پشتەڤانیا خۆ بۆ لیستا 275 یا پارتی دیار دكەن
ئامێدیێ، مەحمود نهێلی:
بەهرام عریف یاسین، بەرپرسێ لقێ 18 یێ پارتی ل ئامێدیێ و بەرپرسێ لژنا بلندا هەوا هەلبژارتنان ل سنۆرێ لقێ ژ بۆ پشتەڤانی و سەرئێخستنا لیستا 275 یا پارتی ل چەندین میحوەرێن جودا یێن سنۆرێ دەڤەرداریا ئامێدیێ، ل گەل كەسایەتی، ریهسپی، هەلبژێر و تەخ و چینێن جودا یێن كۆمەلگەهـ و گوندێن سەر ب سەنتەرێ ئامێدیێ، دێرەلۆكێ كانی ماسێ و كۆمەلگەها كوانێ چەندین جڤین ئەنجام دان.
بەرپرسێ لقێ گۆت: «دەڤەرا ئامێدیێ یا ناڤدارە ب هێلینا شۆڕەشان، خەلكێ وێ یێ شۆڕەشگێر و نشتیمانپەروەر، مریدێن ڕێبازا بارزانی و دلسۆزێن پارتینە، لەورا ژ پشتەڤانیا وە بۆ لیستا 275 و پارتی دیموكراتی كوردستان پشتراستین، هوین ئەوێن دوهی ب خەبات و قوربانیدانێ بەرەڤانی ژ ئاخ و ئازادی و كەرامەتێ كری، ئەڤرۆ ب مالبات و كەسوكارڤە، ب دەنگدانێ بۆ لیستا 275 دێ هەمان ئەرك ئەنجام دەن».
بەرپرسێ لقێ تەكەزكر، هەر دەنگەكی گرنگیا خوە هەیە، لەوما ب هەمان دلسۆزیا جاران هاندەر و ئاگەهداری كەسوكار و دەوروبەرێن خوە بن و پشتراستبن ژ دەنگدانا وان و گۆت: «پارتی بەرەڤانیكەرە ژ دەستكەفتان و هەبوونا پارتی ب مەزنترین ڕێژا دەنگان و كورسییان ل بەغدا، زامنێ مانەڤەیا قەوارێ هەرێمێ و بجهئینانا دەستووری و مسوگەركرنا شایستەیێن دارایی یێن هەرێما كوردستانێ نە».
