جەوییە كۆپا ئیراقێ ب دەستڤە ئینا و نەهێلا خەونا هەولێرییا ببیتە راستی
بۆ جارا حەفتێ د دیرۆكا خوە دا تیما تەپا پێی یا یانەیا جەوییە ب ناسناڤێ كۆپا ئیراقێ هاتە خەلاتكرن و نە هێلا یانەیا هەولێرێ و جەماوەرێ وێ خەونا چەندین سالان بكەتە راست، پشتی ب گۆلەكێ بێی بەرانبەر سەركەفتن ئینایی، د یارییا واندا ئەوا ل شەڤا دەربازبوویی ژ دووماهییا كۆپا ئیراقێ ل یاریگەها شەعب یا نێڤدەولەتی ب بەرهەڤبوونا هژمارەكا مەزن ژ جەماوەرێن هەردو یانەیان.
د نیڤا ئێكێ دا ئاستێ هەردو تیما ناڤنجی بوو دگەل هەبوونا چەند بزاڤەكێن هێرشكرنێ ل سەر گۆلێن هەڤدۆ، د خولەكا 29ێ دا هێرشبەرێ جەوییە موهەنەد عەبدولرەحیم مفا ژ خەلەتییا یاریزانێ هێلا ناڤین یێ یانەیا هەولێرێ وەرگرت و گۆلا ئێكێ بینت ئەوا ئەڤ نیڤە ب گۆلەكێ بێ بەرانبەر ب پێشكەفتنا جەوییە ب دووماهی هاتی، د نیڤا دویێ دا هەر ژ دەستپێكێ یاریزانێن هەولێرێ دەست ب گڤاشتنان كرن ژبۆ راستڤەكرنا ئەنجامێ یاریێ، بەرانبەر دا تیما بەغدایی ژی بەردەوامی دا پلانا خوە یا هێرشبرنێ، یاریزانێن هەولێرێ بەردەوامی دانە گڤاشتنا و چەندین هێرشێن گۆلكرنێ ژ دەستدان یاری ب سەركەفتنا جەوییە ب گۆلەكێ ب دووماهی هات.
بۆ زانین د دیرۆكا قارەمانیێ دا یانەیا زەورا پێنج ناسناڤ دەستڤە ئیناینە، جەوییە بو حەفت ناسناڤ و تەلەبە دو جارا ناسناڤ ئیناینە و كەرخ جارەكێ دەستڤە ئینایە، یانەیا هەولێر 12 جاران پشكداری د كۆپایێ داكرییە بەرانبەر دا زاخۆ 11 جاران و دهۆكێ هەشت جاران پشكداری د كۆپای دا كرینە، ل وەرزێ 2015-2016ێ تیما یانەیا دهۆك گەهشتبوو یارییا پێش دووماهیێ، د یارییا ئێكێ دا ل یاریگەها خوە دهۆك ب4-1 سەركەفتن ل سەر جەوییە ئینابوو، لێ د یارییا دویێ دا ئەوا ل بەغدا هاتیە كرن یانەیا جەوییە گڤاشتن و گەف دژی تیما دهۆكێ كربوون و شیان ب 3-چنە سەركەڤن و ب هەردو یارییان دەربازبنە یارییا دووماهیێ و دگەل زەورا ب دو گۆلان ناسناڤێ كۆپا ئیراقێ دەستڤە ئینا.
