حاکم گۆران ل چیای وەستیەتێن خوە بەلاڤکرن
ئەڤرۆ نيوز:
زێدەتر ژ سال و نیڤایە حاکم گۆران ئەو دادوەرێ وەکو وەفاداری بۆ بڕیارا سەرۆک بارزانی ل دۆر ئەنجامدانا ریفڕاندۆمێ و ب دەستڤەئینانا سەربخوەیا کوردستانێ، ژ وەلاتێ ھۆلەندا خێزانا خوە ھێلایە و قەستا کوردستانێ کریە و ل سەر ئێک ژ چیایێن سنوورێ پارێزگەھا دھۆکێ مانگرتن ئەنجام دایە و د نھا دا حاکمی چەند وەسیەتێن خوە نڤیساینە و ب رێکا رۆژناما ئەڤرۆ ئەوان وەسیەتان بەلاڤ دکەت.
حاکم گۆران بۆ رۆژناما ئەڤرۆ گۆت: “بۆ دەمێ 18 ھەیڤایە ئەز ل سەر ئێک ژ چیایێن سنوورێ پارێزگەھا دھۆکێ مە، من خێزانا خوە ل ھۆلەندا ھێلایە و خێزانا من رۆژ ب رۆژ ژ من تۆرەتر دبیت ژ ڤی کارێ من ئەنجام دای، لێ ئەز ژ بڕیارا خوە پەشیمان نەبوویمە و یێ بەردەوامم”.
ناڤھاتی ئاشکرا ژی کر، ھەموو ھیڤیێن وی ئەون کو چاکسازی ل کوردستانێ بھێنە کرن و سەربخوەیی بھێتە ب دەستڤەئینان، لەورا ھەتا نھا ئەو ل چیای مایە و گۆت: “من دو کوڕ ھەنە و ھەڤژین و کوڕێن من ژ ئەڤی کارێ من ئەنجام دای د تۆرەنە، لێ من ل سەر ئەڤی چیای چەند وەسیەت نڤیساینە و ئێک ژ وەسیەتێن من ئەوە کو من د نڤیسانەکا دو لاپەڕی دا بۆ خێزانا خوە دیارکریە، بۆچی من ئەڤ کارە کریە؟ بۆچی من خێزانا خوە ھێلایە و من دڤیا ئەز چ کار بۆ مللەتێ خوە بکەم؟”.
گۆتژی: “من د وەسیەتا خوە یا دویێ دا بۆ ھەموو لایەنێن سیاسی ل ھەرێمێ و ھەموو خەلکێ کوردستانێ و خێزانا خوە دیارکریە و من داخواز کریە ھەکە ئەز وەغەر بکەم و ب مرم، ئەز دخوازم تەرمێ من ل سەر ئەڤی چیای ل جھێ مانگرتنا من بھێتە ڤەشارتن، داکو گۆڕێ من ببیتە بیرھاتنەک بۆ نفشێ کورد کو کەسەک ھەبوویە ژ پێخەمەت ب دەستڤەئینانا سەربخوەیا کوردستانێ خوە گۆری ئەڤێ ئاخێ کریە، ئەز ژ دل دخوازم تەرمێ من ل سەر ئەڤی چیای بھێتە ڤەشارتن”.
