حزبیكرنا ههر تشتی
پشتی خهلكێ كوردستانێ ژ ئهگهرێ كێمیا خزمهتگوزاریان و داخوازكرنا مووچێن خوه نهكو ههمی مافێن خوه، كو ئهڤه سهرێ دوو سالانه ههوار ههوارا خهلكی یه، پشتی قهستا ههمی جهان كری كهسێ گوه لێ نهگرت و پسیارا وان نهكر، د گهل بلندبوونا دهنگێ نهرازیێ خهلكی ئێكسهر ئاراستهیێ خونیشاندهران هاته گوهارتن و ئێخستنه دناڤا ئالوزی و كوشتنا خهلكێ بێ گونهه و سوتنا وان جهێن نه ئارمانجا وان دا، بهلێ ل شوینا حكومهت و پهرلهمانێ ههرێمێ و پارتێن سیاسی ل هانا ڤی خهلكی بچن و پسیارا ماف و داخوازیێن وان بكهن، بێی ئێك ژ ههمیان خو ب بهرپرسیار بزانیت رابوون ب دهركرنا بهیاننامه ل دویڤ بهیاننامێ بو تومهتباركرنا ههڤ، ب خوه سهپاندنێ و دهستێ دهرهكی و هاندانا وهلاتیان، ئهڤه ژی دووباره پشت گوه هاڤێتنا داخوازیێن خهلكێ نهرازی یه.
پهیدابوونا ئالوزیان و گوهورینا ئاڕاستهیێ خونیشاندانا نه تشتهكێ دووره، ل ههمی جیهانێ روو ددهت، لێ تشتێ سهیر ئهوه دهمێ هیچ سازیهك خو نهكهته خودان ل داخوازیێن خونیشادهران، ب بههانهیا قهیرانا دارایی و بڕینا بودجێ، ئهرێ ئهڤه دوو ساله كانێ پلانا حكومهتێ بۆ دهربازبوون ژ قهیرانێ ؟ ئهرێ جارهكێ حكومهتێ پسیار كریه خهلكهك چاوا دژیت بێی مووچه؟
ماف و داخوازیێن خهلكێ كوردستانێ د رهوانه، بلا نههێنه حزبیكرن وهكی ههمی تشتهكی ل ڤی وهڵاتی، ئهو داخوازیێن خهلكێ سلێمانیێ خونیشادان بو كری ههمان داخوازیێن خهلكێ دهوك و سهرانسهری كوردستانێ نه، بهلێ مه نهدیت بهرپرسێن حكومهتێ ههر ژ سهروكێ ههرێمێ تا نزمترین پله ئێك پێنگاڤ هاڤێتی بهرهڤ چارهسهریێ و ئارامیێ بهلكو ههتا نهشیان گوهدانا داخوازێن خهلكێ خونیشاندهر بكه ، و قهوانێن خویێن ههلبژارتنان ژبیركرن دهمێ سوزێن خو دنڤێسین ژ بهرگێن ههمی پهرتوكان مهزنتر بوون .
تومهتباركرنا ههڤدوو ژلایێ لایهنێن سیاسی ڤه، نهشیانا حكومهتێ بو گوهدانا داخوازیێن خهلكی ل دهڤهرهكێ بو یا دی، ئاراستهكرنا خونیشاندانێن جهماوهری ژلایێ لایهنهكێ سیاسی دژی لایهنهكێ دیتر، ئهڤه نیشانێن وێ دوو ئیدارهیێ نه ئهوا دناڤ كابینا بنكه فراوان یا خزمهت بهرتهنگ دا هاتیه ڤهشارتن، نیشانێن نهبوونا سازیێن حكومهتێ نه كو بشێن بێ لایهن بن د پێشهاتان دا بهلێ دهمهكی ب شهڤ و رۆژ دكرنه ههوار د گوت دهولهت بوون یا نێزیكه، ئهڤه زاڵ بوونا بڕیارا حزبی یه ل سهر بڕیارا فهرمی و ههر لایهنێ سهروكاتیا دهزگایهكی دكهت بتنێ دبینیت ئهو دهزگا یێ شهرعیه و یێن دی ههمی كهمتهر خهمن و نهشهرعی.
نه ههست كرن و نه ههلگرتنا بهرپرسایهتیێ ژلایێ دهستههڵاتێ ڤه، شهرمزاركرنا دهنگێ نهرازیێ خهلكی و مافێن وان و تومهتباركرنا ههڤدوو، نه چارهیه بۆ ئارێشان، ئهڤجا گهلی دهستههڵاتداران وهرن خو بكهنه خودانێن مللهتی وهكی ل ههلبژارتنان هوون خودان، و كار و بهرپرساتیێن خوه ههمبهر مللهتی بگرنه دهست، ئهڤه مافێ وی خهلكێ یه ل سهر ههوه یێ هوون كرینه نونهرێن خوه.
