حنێرا (فه‌قیێ ته‌یران) د كۆپله شعره‌كا وی دا
دلۆڤان هالۆ/ زاخۆ
شاعرێ مه‌زن یێ كورد (فه‌قیێ ته‌یران)، د كۆپلا (27)ێ دا ژ شعرا خوه یا ب ناڤێ (ئیرۆ ژ ده‌ست حوسنا حه‌بیب) دبێژیت:
خوزی من سه‌د سه‌ر هه‌بانا
سه‌د هزار ده‌ڤ پێڤه‌بانا
ئه‌و هه‌موو ل مه‌دحێ ته‌بانا
هێژ ب وان نوقصانم ئه‌ز
(فه‌قیێ ته‌یران) ئه‌ڤ كۆپله شعره ب شێوه‌یه‌كێ جوان و ڕه‌هوان، و ب زمانه‌كێ ساده و سڤك نڤیسیه، كو ده‌مێ خوانده‌ڤان ڤێ كۆپله شعرێ دخوونیت، چێژه‌كا تایبه‌ت ژێ وه‌ردگریت، و هه‌ر ئێكسه‌ر و ب ساناهی ژ به‌ر دكه‌ت و دمینیته د بیردانكا وی دا، چه‌ند دوباره ژی بخوونیت، هه‌مان چێژا خواندنا جار ئێكێ ژێ دبینیت.
هه‌كه (فه‌قیێ ته‌یران) ب ئێك سه‌ر و ب ئێك ده‌ڤ، كۆپله شعره‌كا ب ڤی شێوه‌یی ئاست بلند نڤیسیبیت، و تێدا ب جوانترین شێوه په‌سنا خودێ كربیت، لێ هه‌كه وی ب زانین و تێگه‌هشتنا مێشكێ سه‌د سه‌ران، و ب ڕه‌وانبێژیا سه‌د هزار ده‌ڤان.
ئه‌رێ دا كۆپله شعره‌كا چاوا نڤیسیت؟!، و دا ب چ شێوه تێدا په‌سنا خودێ كه‌ت؟!، و هه‌كه په‌سنا (فه‌قیێ ته‌یران) بۆ خودێ هه‌تا ڤی ئاستی یا بلند و مه‌زن بوو، ئه‌رێ حه‌ز ژێكرنا وی بۆ خودێ ل چ ئاست بوو؟!.
سه‌ره‌ڕایی حنێرا (فه‌قیێ ته‌یران) د ڤێ كۆپله شعرێ دا، دانپێدانێ ب وێ چه‌ندێ دكه‌ت، كو هه‌كه وی سه‌د سه‌ر هه‌بان و سه‌د هزار ده‌ڤ پێڤه بان، و هه‌می د خزمه‌تا په‌سنا خودێ دا بان، ژ ده‌رهه‌ق په‌سنا خودێ نه ده‌ردكه‌ڤت، و دا هه‌ر كێماسی ل ده‌ڤ هه‌بن، و نه د شیا وه‌كو پێدڤی په‌سنا خودێ بكه‌ت.
ژێده‌رێ كۆپله شعرێ:
سه‌عید دێره‌شی، دیوانا (فه‌قیێ ته‌یران)، ژ وه‌شانێن ده‌زگه‌هێ سپیرێز، چاپخانا وه‌زاره‌تا په‌روه‌ردێ، هه‌ولێر، 2005، لاپه‌ڕه 87.
